ජනපති පොදු සමාව යටතේ අනීතිකව අධිකරණයෙන් නිදහස්ව ගිය බවට ඉකුත් සමයේ ආන්දෝලනයක් මැවූ ඩබ්ලිව් එම් අතුල තිලකරත්නට අනුරාධපුර මහාධිකරණයෙන් බරපතල වැඩ සහිත සිර දඬුවම් නියම කර තිබෙනවා. එමෙන්ම පැමිණිළිකාර වෛද්‍යවරයාට ලක්ෂ හතලිහක වන්දියක් ගෙවීමටත් නියෝග කර ඇති බවයි නෙත් නිවුස් වාර්තාකරු සඳහන් කළේ. ඒ, මෙරට ප්‍රසිද්ධ මූල්‍ය ආයතනයක කළමනාකාරු ලෙස සිටිමින් අදාළ මූල්‍ය ආයතනය තුල වෛද්‍ය එස් ඩබ් ඒ ගාමිණි විමලානන්ද මහතා තැන්පත් කර තිබූ රුපියල් ලක්ෂ තිස් පහක පමණ මුදලක් බැංකුවකින් මුදල් ලබා ගැනීමට භාවිතා කරන ලේඛනයක් කූඨ ලෙස සාදව්‍ය පරිහරණය කිරීමේ චෝදනා දෙකට අදාළවයි. අනුරාධපුර මහාධිකරණ විනිසුරු ආචාර්ය නලීන් ද හේවාවසම් මහතා විසින් මෙම නියෝගය නිකුත් කර තිබෙනවා. ඩබ්ලිව් එම් අතුල තිලකරත්න, ඉකුත් සමයේ රට තුළ ඇති කළේ දැඩි කතාබහක්. ඒ, ඉකුත් සමයේ ඉකුත් වෙසක් පුර පසොලාස්වක පොහොය දිනය දා තමන්ට ජනාපති පොදු සමාව ලබා දී ඇති දන්වමින් අනුරාධපර බන්ධනාගාර අධිකාරිවරයා අනුරාධපුර මහාධිකරණයට ඉදිරිපත් කළ ලිපියක් පදනම් කර ගෙන නීතියට පටහැනි අයුරින් ජනපති පොදු සමාව යටතේ අධිකරණයෙන් නිදහස්ව යාමේ සිද්ධියත් සමගයි. ඒවන විට ඔහු රක්‍ෂිත බන්ධනාගාරගත කර සිටියේ මෙම මූල්‍ය වංචාව සම්බන්ධවයි. ඒ අනුව බැංකුවකින් මුදල් ලබා ගැනීමට භාවිතා කරන ලේඛනයක් කූඨ ලෙස සකස් කර මුදල් ලබා ගැනීමේ චෝදනාවට විත්තිකාර ඩබ්ලිව් එම් අතුල තිලකරත්නට වසර පහක බරපතල වැඩ සහිත සිර දඬවමක් නියම කිරීමටයි මහාධිකරණ විනිසුරු ආචාර්ය නලීන් ද හේවාවසම් මහතා ඊයේ නියෝග කර ඇත්තේ. එමෙන්ම සාවද්‍ය පරිහරණය කිරීමේ චෝදනාවට තවත් වසර දෙකක බරපතල වැඩ සහිත අනිවාර්ය සිර දඬුවමක් නියම කර තිබෙනවා. ඊට අමතරව මෙම නඩුවේ පැමිණිලිකාර වෛද්‍ය එස් ඩබ් ඒ ගාමිණි විමලානන්ද මහතාට මුදලින් රුපියල් ලක්ෂ හතලිහක වන්දියක් ගෙවන ලෙසටයි විත්තිකරුට නියෝග කර ඇත්තේ. එම වන්දි මුදල ගෙවීම පැහැර හරින්නේ නම් විත්තිකරුට තවත් මාස දහයක සිර දඬුවමක්ද නියම කර තිබෙනවා. මහාධිකරණ විනිසුරුවරයා මෙසේ නියෝග කළේ විත්තිකාර අතුල තිලකරත්නට එරෙහිව පැවති මෙම නඩුවේ විභාගය අවසන් කර එහි තීන්දුව ප්‍රකාශයට පත් කිරීම සඳහා අදාළ නීති කෘත්‍ය අනුරාධපුර මහාධිකරණය හමුවේ යළි කැඳවූ අවස්ථාවේදීයි.