මහජන චීනසමූහාණ්ඩුවේ නිල සංචාරයක නිරත අගමැති ආචාර්ය හරිනි අමරසූරිය , බීජිංහිදී මහජන චීන සමූහාණ්ඩුවේ රාජ්ය කවුන්සිලයේ අග්රාමාත්ය අතිගරු Li Qiang මහතා හමුවි තිබෙනවා.
එම හමුවේදී අග්රාමාත්යවරිය විසින් මහජන චීන සමූහාණ්ඩුවේ 76 වන සංවත්සරයට සුබ පැතුම් එක් කළ අතර 2025 කාන්තා ගෝලීය නායකයින්ගේ සමුළුවට සහභාගී වීමට චීනය කළ ආරාධනය සහ ශ්රී ලංකා දූත පිරිසට දැක්වූ උණුසුම් ආගන්තුක සත්කාරය වෙනුවෙන් අග්රාමාත්යවරිය ශ්රී ලංකා රජය වෙනුවෙන් සිය කෘතඥතාව පළ කරනු ලැබුවා.
මෙම චීන නිල සංචාරය අග්රාමාත්යවරිය ලෙස ආචාර්ය හරිනි අමරසූරියගේ පළමු චීන නිල සංචාරය වනවා.
මෙම චීන නිල සංචාරය හරහා දෙරටේ වෙළඳාම, ආයෝජන, සංචාරක, සංස්කෘතිය සහ ජනතාව අතර ද්විපාර්ශවීය සබඳතා තවදුරටත් ශක්තිමත් කිරීමට අවස්ථාවක් ලැබෙන බව ආචාර්ය හරිනි අමරසූරිය පැවසුවේ.
ගෝලීය ආර්ථිකයේ සහ නවෝත්පාදනයේ ප්රධාන නියෙමුවෙකු ලෙස මෙන්ම දරිද්රතාවය අඩු කිරීම, යටිතල පහසුකම් සංවර්ධනය කිරීම, මානව-ප්රාග්ධන සංවර්ධනය සහ ජාත්යන්තර සහයෝගීතාවයේ හවුල්කරුවෙකු ලෙස චීනයේ භූමිකාව පැසසසුමට ලක් කළ අග්රාමාත්යවරිය, ශ්රී ලංකාව ගෙන යන "පොහොසත් රටක් - ලස්සන ජීවිතයක්" යන දැක්ම පැහැදිලි කළ අතර 2025 ජනවාරි මාසයේදී දියත් කරන ලද ක්ලීන් ශ්රී ලංකා වැඩසටහන ඇතුළුව දරිද්රතාවය තුරන් කිරීම, තිරසාරත්වය ශක්තිමත් කිරීම, ඩිජිටල් පරිවර්තනය ඉදිරියට ගෙන යාම සහ සදාචාරාත්මක පාලනය ප්රවර්ධනය කිරීම සඳහා වන ජාතික ප්රමුඛතා පිළිබඳව තවතුරටත් විස්තර කල බවයි අග්රාමාත්ය මාධ්ය ඒකකය සඳහන් කර සිටියේ.
තවද ආර්ථික සහයෝගීතාවය සම්බන්ධයෙන්, නිල ණය හිමි කමිටුවේ සාමාජිකයින් සමඟ ණය ප්රතිව්යුහගත කිරීමේ මෑත කාලීන ප්රගතිය ඇතුළුව ශ්රී ලංකාවේ සාර්ව ආර්ථික ස්ථාවරත්වය සහ වර්ධන ගමන් පථය පිළිබඳව මෙහිදී අග්රාමාත්ය ආචාර්ය හරිනි අමරසූරිය විසින් චීන අග්රාමාත්යවරයා හට පැහැදිලි කරනු ලැබුවා.
ඒ සඳහා චීනය විසින් ලබා දෙන අඛණ්ඩ සහයෝගය පැසසුමට ලක් කළා ය.
චීනයේ එක් තීරයක් එක් මාවතක් (BRI) ව්යාපෘතිය යටතේ ලැබෙන අඛණ්ඩ සහයෝගීතාවය පිළිගත් අග්රාමාත්යවරිය, ප්රධාන සංවර්ධන හවුල්කරුවෙකු ලෙස චීනයේ භූමිකාව අවධාරණය කරමින් ජාතික හා කලාපීය සම්බන්ධතාවයට සහ සමාජ-ආර්ථික සංවර්ධනයට දායක වන අඛණ්ඩ සහ යෝජිත ව්යාපෘති පිළිබඳ සඳහන් කර සිටියා.
කාර්මික සංවර්ධනය ශක්තිමත් කිරීම සඳහා සහයෝගීතාව සහ කාර්මික හා සැපයුම් දාම සහයෝගීතාව පිළිබඳ 2025 මැයි මාසයේ ඇති කරගත් අවබෝධතා ගිවිසුමට අනුගත වෙමින් ආයෝජන හෝ රාජ්ය-පෞද්ගලික හවුල්කාරිත්ව ක්රමවේද යටතේ හම්බන්තොට ඇසුරුම් මධ්යස්ථානයක් පිහිටුවීමට සිදු කළ යෝජනාව ඇතුළුව, වෙළඳාම සහ ආයෝජන සඳහා අවස්ථා පිළිබඳ අග්රාමාත්යවරිය මෙහිදී සඳහන් කළා ය.
පොහොර සැපයුම් ඇතුළුව දේශීය නිෂ්පාදනය සඳහා යෙදවුම් සඳහා පහසුකම් සැලසීමේ පියවර පිළිබඳව ද අග්රාමාත්යවරිය අග්රාමාත්ය Li Qiang සමඟ සාකච්ඡා කළ අතර චීන වෙළඳපොළ තුළ ශ්රී ලංකාවේ ස්වර්ණාභරණ අංශයට සහයෝගය ලබාගත හැකි මාර්ග පිළිබඳ අවදානය යොමු කළා ය.
ස්මාර්ට් පන්ති කාමර, ශිෂ්යත්ව, රාජ්ය නිලධාරීන් සඳහා විශේෂ පශ්චාත් උපාධි වැඩසටහන් සහ පාසල් නිල ඇඳුම් පරිත්යාග ඇතුළු අධ්යාපන අංශයේ සහයෝගීතා ක්ෂේත්ර පිළිබඳව ද මෙහිදී සාකච්ඡා කෙරිණු අතර කෘෂිකර්මාන්තය, සංචාරක ව්යාපාරය, ආරක්ෂක සහ සෞඛ්ය යන ක්ෂේත්රවල සහයෝගීතාව ද මෙහිදී අවදානයට ලක් විය.
කාන්තා අයිතිවාසිකම් සහ ස්ත්රී පුරුෂ සමානාත්මතාවය ඉදිරියට ගෙන යාම සඳහා ශ්රී ලංකාවේ දායකත්වය තහවුරු කළ අග්රාමාත්ය ආචාර්ය අමරසූරිය, බීජිං ප්රකාශය සහ ක්රියාකාරී වේදිකාව (Beijing Declaration and Platform for Action) සදහා සිය අඛණ්ඩ සහයෝගය ලබා දෙන බව ප්රකාශ කළ අතර කාන්තා නායකත්වය, බලගැන්වීම,කාන්තාවන් සඳහා සම අවස්ථා ලබා දීම සහ ප්රචණ්ඩත්වයෙන් ආරක්ෂා කිරීම සඳහා වන ජාතික කැපවීම අවධාරනය කළා ය.
