බන්ධනාගාර තදබදය තවදුරටත් ඉහළ ගොස් තිබෙනවා.

ඒ අනුව බන්ධනාගාරවල රඳවා සිටින රැඳවියන් ගණන පසුගිය 17 වනදා වන විට 33,095ක් දක්වා ඉහළ ගොස් ඇති බවයි බන්ධනාගාර ආරංචි පැවසුවේ.

වැඩිම රැඳවියන් පිරිසක් රඳවා සිටින්නේ වැලිකඩ බන්ධනාගාරයේයි. එම ගණන 3,557ක් වනවා.

එහෙත් එම බන්ධනාගාරයේ රඳවා තැබිය හැකි රැඳවියන් ගණන 750ක් බවයි බන්ධනාගාර ආරංචි පැවසුවේ.

රැඳවියන් 625ක් රඳවා තැබිය හැකි කොළඹ මැගසින් බන්ධනාගරයේ මේ වන විට රඳවා සිටින රැඳවියන් ගණන 2,985ක්.

කොළඹ රිමාන්ඩ් බන්ධනාගාරයේ ද රැඳවියන් 2,426ක් රඳවා සිටිනවා. එහෙත් එම බන්ධනාගාරයේ රැඳවිය හැකි රැඳවියන් ගණන 385ක් බවයි බන්ධනාගාර ආරංචි පැවසුවේ.

වැලිකඩ කාන්තා බන්ධනාගාරයේ රැඳවිය හැකි කාන්තා රැඳවියන් ගණන 220ක් වුවද මේ වන විට කාන්තා රැඳවියන් 561ක් එහි රඳවා සිටින බවයි බන්ධනාගාර ආරංචි වැඩිදුරටත් පැවසුවේ.