පාර්ලිමේන්තුව අද පෙරවරු 09.30ට යළි රැස් වනවා. 2002 අංක 05 දරණ නිලධරයන් ඉවත් කිරීමේ කාර්ය පටිපාටිය පනතේ 17 වන වගන්තිය ප්‍රකාරව පොලිස්පති දේශබන්දු තෙන්නකෝන් මහතා එම ධූරයෙන් ඉවත් කිරීම පිණිස වූ යෝජනාව අද පාර්ලිමේන්තුවේදී විවාදයට ගැනීමට නියමිත බව අදට නියමිත පාර්ලිමේන්තු න්‍යාය පත්‍රයේ දැක්වෙනවා. දේශබන්දු තෙන්නකෝන් මහතා විසින් සිදුකර ඇතැයි කියන විශමාචාර සහ සිය ධූරයේ බලතල බරපතල අන්දමින් අනිසි ලෙස යොදා ගැනීම සම්බන්ධයෙන් විමර්ශනය කර වාර්තා කිරීමට පත්කළ පරීක්ෂණ කමිටුවේ වාර්තාව පසුගිය මස 21 වනදා කථානායකවරයා වෙත භාරදී තිබුණා. එම වාර්තාව කථානායකවරයා විසින් පාර්ලිමේන්තුවේ සභාගත කරේ ඉකුත් 22 වනදායි. අදාල වාර්තාව මගින් පොලිස්පතිවරයාට එරෙහිව නඟන ලද චෝදනා 23 අතරින් 19කට ඔහු වරදකරු කර ඇති බව සඳහන්. ඒ අනුව එකී වාර්තාව විවාදයට ගෙන පාර්ලිමෙන්තු යෝජනා සම්මතයකින් දේශබන්දු තෙන්නකෝන් මහතා පොලිස්පති ධූරයෙන් ඉවත් කිරීමට නියමිතව තිබෙනවා. දේශබන්දු තෙන්නකෝන් මහතාට එරෙහිව එල්ල වූ චෝදනා සම්බන්ධයෙන් විමර්ශනය කළ කමිටුවේ සභාපතිවරයා ලෙස කටයුතු කළේ එවකට ශ්‍රේෂ්ඨාධිකරණ විනිසුරු සහ වත්මන් අගවිනිසුරු ප්‍රීති පත්මන් සූරසේන මහතායි. අභියාචනාධිකරණ විනිසුරු නීල් ඉද්දවෙල සහ ජාතික පොලිස් කොමිසමේ සභාපති ලලිත් ඒකනායක යන මහත්වරුන් එම කමිටුවේ සෙසු සාමාජිකයින් ලෙස කටයුතු කළා. මෙම පරීක්ෂණ කමිටුව අවස්ථා 10කට වැඩි ගණනකදී රැස්වී සාක්ෂි සටහන් කර ගැනීමෙන් අනතුරුව සිය අවසන් වාර්තාව කථානායකවරයා වෙත භාරදෙනු ලැබුවා.