දුෂ්කර පාසල් සංවර්ධනය කිරීම සඳහා තෝරා ගැනීමේදී හිතවත්කම් මත නොව දිස්ත්‍රික් සංවර්ධන කමිටුවේ අනුමැතිය මත තෝරා ගැනීම සිදු කළ යුතු බවත්, නව අධ්‍යාපන ප්‍රතිසංස්කරණය තුලින් සියලු දරුවන්ට රැකියාවකට යොමුවීමට හෝ උපාධිය හැදැරීමට අවස්ථාව හිමිවන බවත් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පවසනවා. නැගෙනහිර පළාත් සභාවේ පැවති නැගෙනහිර පළාත නියෝජනය කරන නිලධාරීන් දැනුවත් කිරීමේ වැඩසටහනක් අමතමින් අග්‍රාමාත්‍යවරිය මේ බව පැවසීය. මෙහිදී වැඩිදුරටත් අදහස් දැක් වූ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය. " මේක අපි සියලු දෙනාට ලැබෙන ඓතිහාසික අවස්ථාවක්. ලෝකයට ගැලපෙන ගුණාත්මක අධ්‍යාපනයක් ලබා දෙන්න අධ්‍යාපන ප්‍රතිසංස්කරණය හරහා අපිට හැකි වෙනවා. සියලු දරුවන්ට පාසල් අධ්‍යාපනය අවසන් කරනවිට රැකියාගත වෙන්න පුලුවන් විදිහට NVQ සහතිකයක් හිමි වෙනවා. පවතින අධ්‍යාපන ක්‍රමය තුළ දරුවන් රැකියාවට යනකොට කියන්නේ කුසලතා පුර්ණය කරලා නෑ කියලා ඒ නිසා විශ්වවිද්‍යාලවලට සිදු වෙලා තිබෙන්නේ මෘදු කුසලතා සංවර්ධනය කරන්න. ඒක කරන්න ඕන පාසල්වලින්. 9 වසරේ ඉදලා දරුවන්ට තමන් ඉදිරියේදී කරන්න ඕන වෘත්තීය මොකක්ද කියලා තීරණය කරන්න ඒ වෙනුවෙන් අත්දැකීමක් ලබා ගන්න අවස්ථාවක් නව ප්‍රතිසංස්කරණයෙන් ලැබෙනවා. වසර 11ක් හෝ 13ක් අධ්‍යාපනය ලබලා පාසලෙන් ඉවත්වන දරුවන්ට අවශ්‍ය නම් රැකියාවක් කරන්නත් පුලුවන්, අවශ්‍ය නම් උපාධිය හදාරන්නත් අවස්ථාව තිබෙනවා. කැමතිනම් රැකියාව කරන ගමන් උපාධිය හදාරන්නත් අවස්ථාව තිබෙනවා. අධ්‍යාපන ප්‍රතිසංස්කරණය තුළ විෂය නිර්දේශය පමණක් නෙමෙයි පාසල් යටිතල පහසුකම් සංවර්ධනය කරන්න, ගුරුවරුන් පුහුණු කරන්න, ප්‍රතිසංස්කරණය පිලිබඳ ජනතාව තුළ කතිකාවක් ඇති කරන්නත් කටයුතු කරනවා. යටිතල පහසුකම් සංවර්ධනය කරන්න මේ වසරේ වෙන්කර ඇති මුදල් නිසි පරිදි යොදා ගන්න. ඒ වගේම දුෂ්කර පාසල් සංවර්ධනය කිරීමට තෝරා ගැනීමේදී ගමේ කමට හෝ හිතවත් කමට තෝරගන්න එපා. නිසි ක්‍රමවේදයකට තොරාගෙන දිස්ත්‍රික් සංවර්ධන කමිටුවේ අනුමැතිය ඇතිව සිදු කරන්න. දුෂ්කර පාසල්වල දරුවන් දුෂ්කර ගම්වල හිරකරගෙන ගුණාත්මක අධ්‍යාපනය ලබා දෙන්න බැහැ. "
Published
