සේවය අත්හිටුවා සිටින පොලිස්පති දේශබන්දු තෙන්නකෝන් මහතා පසුගිය කාලය පුරා පුවත් මැවූ චරිතයක්. ඔහු සම්බන්ධයෙන් තවත් සුවිශේෂී කරුණක් අද පාර්ලිමේන්තුවේ කටයුතු ආරම්භයේදී කතානායකවරයා සභාවට දැනුම්දුන්නා. ඒ, දේශබන්දු තෙන්නකෝන් මහතා විසින් සිදුකර ඇතැයි කියන විශමාචාර සහ සිය ධූරයේ බලතල බරපතල අන්දමින් අනිසි ලෙස යොදා ගැනීම සම්බන්ධයෙන් විමර්ශනය කර වාර්තා කිරීමට පත්කළ පරීක්ෂණ කමිටුවේ වාර්තාව ඉදිරිපත් කරමින්. ඒ අනුව එම පාර්ලිමේන්තු පරීක්ෂණ කමිටුව විසින් දේශබන්දු තෙන්නකෝන් මහතා අදාළ චෝදනා සඳහා වරදකරු කර ඇති බවයි කතානායකවරයා පාර්ලිමේන්තුවේදී කියා සිටියේ.

ශ්‍රේෂ්ඨාධිකරණ විනිසුරු ප්‍රීති පත්මන් සූරසේන මහතාගේ සභාපතිත්වයෙන් යුත් එම කමිටුවේ සෙසු සාමාජිකයින් ලෙස අභියාචනාධිකරණ විනිසුරු නීල් ඉද්දවෙල සහ ජාතික පොලිස් කොමිසමේ සභාපති ලලිත් ඒකනායක යන මහත්වරුන් කටයුතු කළා. මෙම පරීක්ෂණ කමිටුව අවස්ථා 10කට වැඩි ගණනකදී රැස්වී සාක්ෂි සටහන් කර ගැනීම සිදු කරනු ලැබුවා. මේ අතර සභා නායක අමාත්‍ය බිමල් රත්නායක මහතා කියා සිටියේ අදාළ වාර්තාව පාර්ලිමේන්තුවට ඉදිරිපත් කිරීමෙන් පසු පොලිස්පතිවරයා ධූරයෙන් ඉවත් කිරීමේ ක්‍රියාවලිය සභාවට ඉදිරිපත් කරන ලෙස කතානායකවරයාගෙන් ඉල්ලා සිටින බවයි. අද දිනය තුළ එය ඉදිරිපත් කරන ලෙසද සභා නායකවරයා ඉල්ලා සිටියා. ඊට ප්‍රතිචාර දක්වමින් මුලසුනේ රැඳී සිටි නියෝජ්‍ය කතානායක වෛද්‍ය රිස්වි සාලි මහතා කියා සිටියේ කතානායකවරයා සමග සාකච්ඡා කර ඒ සම්බන්ධයෙන් සභාවට දැනුම්දෙන බවයි.