Published
මේ වසරේ මෙතෙක් සිදු වූ අලි මරණවලින් සියයට 17ක් සිදුව ඇත්තේ වෙඩි වැදීම්වලින් බව වනජීවී අධ්‍යක්ෂ ජනරාල් රංජන් මාරසිංහ මහතා පවසනවා. ඔහු කියා සිටියේ වාර්ෂිකව වාර්තාවන අලි මරණවලින් සියයට 20කට ආසන්න ප්‍රමාණයක් සිදු වන්නේ ගිනි අවිවලින් සිදුවන වෙඩි වැදීම්වලින් බවයි.
ඉදිරියේදී නීති විරෝධී ගිනි අවි සොයා දැවැන්ත වැටලීමක් සිදු කරන බව වනජීවී අධ්‍යක්ෂ ජනරාල්වරයා මෙහිදී පැවසුවා. අද පැවති මාධ්‍ය හමුවකදී ඔහු මෙම අදහස් පළ කළ අතර එම මාධ්‍ය හමුවට වනජීවී සෞඛ්‍ය අංශයේ අධ්‍යක්ෂ තාරක ප්‍රසාද් මහතා ද එක්ව සිටියා. ඔහු එහිදී කියා සිටියේ වෙඩි වැදීම හේතුවෙන් භාතිය හස්තියා අසාද්‍ය තත්ත්වයෙන් පසුවන බවට මාස දෙකකට ආසන්න කාලයක් යන තුරුම වනජීවී නිලධාරින්ට නිරීක්ෂණය වී නොමැති බවයි. භාතිය හස්තියාට අත්වූ අවාසනාවන්ත ඉරණම සම්බන්ධයෙන් ඔහු මෙහිදී අදහස් පළ කළා. මේ අතර “කණ්ඩලමේ හැඩකාරයා” නමින් හඳුන්වන වන අලියාගේ ඉදිරි පාදයට වෙඩි වැදීම හේතුවෙන් එම වන අලියා ද ඉතා අපහසුවෙන් සිටින බවට මේ වන විට වාර්තා වනවා. මාස ගණනාවක සිට වනජීවී නිලධාරීන් අවස්ථා කිහිපයකදීම මෙම වන අලියාට ප්‍රතිකාර කර ඇති බවයි වැඩිදුරටත් වාර්තා වුණේ.
