බේරුවල, මොරගොල්ල ශ්‍රී බුද්ධසිරි මහා විහාරයෙහි අභිනවයෙන් ඉදිකරන ලද සංකස්සපුර ශ්‍රී සම්බුද්ධරාජ මහා විහාර මන්දිරය විවෘත කිරීමේ පුණ්‍යමහෝත්සවය සඳහා පසුගිය දා හිටපු ජනාධිපති මහින්ද රාජපක්ෂ මහතා සම්බන්ධ වී තිබෙනවා.
පහතින් සදහන් වන්නේ හිටපු ජනාධිපති මහින්ද රාජපක්ෂ මහතා ඔහුගේ මුහුණු පොතේ තැබූ සටහනකි.
බේරුවල, මොරගොල්ල ශ්‍රී බුද්ධසිරි මහා විහාරයෙහි අභිනවයෙන් ඉදිකරන ලද සංකස්සපුර ශ්‍රී සම්බුද්ධරාජ මහා විහාර මන්දිරය විවෘත කිරීමේ පුණ්‍යමහෝත්සවය සඳහා පසුගිය 26වන දින බැති සිතින් සම්බන්ධ වුණෙමි.
ශ්‍රී ලංකා අමරපුර මූලවංශික මහා නිකායේ කාරක සංඝ සභික, සිරි සීලසුමන විද්‍යාතිලක මහා පිරිවෙන් ගරු පරිවේණාධිපති, ශ්‍රී බුද්ධසිරි මහා විහාරධිපති, බේරුවල දකුණු ශාසනාරක්ෂක බල මණ්ඩලයේ ගරු ලේඛකාධිකාරී, ශාස්ත්‍රපති පණ්ඩිත පූජ්‍ය මොරගල්ලේ අරියවිමල තිස්ස නාහිමිපාණන් වහන්සේගේ සංකල්පයකට අනුව නිර්මාණය කරන ලද මෙම මහා විහාර මන්දිරය ශ්‍රී ලංකා අමරපුර මූලවංශික මහා නිකායේ අනු නායක අතිපූජ්‍ය කලුවාමෝදර සීලරතන තිස්ස නාහිමිපාණන් වහන්සේගේ සහ ශ්‍රී ලංකා අමරපුර මූලවංශික මහා නිකායේ මහා නායක අතිපූජ්‍ය අහුන්ගල්ලේ විමලධම්ම තිස්සාභිධාන මහා නාහිමිපාණන් වහන්සේගේ ආශිර්වාදයෙන් ශ්‍රී ලංකා අමරපුර මහා සංඝ සභාවේ උත්තරීතර මහා නායක ගෞරවාර්හ අතිපූජ්‍ය කරගොඩ උයන්ගොඩ මෛත්‍රී මූර්ති උත්තරීතර මහා නායක ස්වාමින්ද්‍රයන් වහන්සේගේ ප්‍රධානත්වයෙන් පැවති මෙම පිං කටයුත්ත සඳහා සම්බන්ධ වීමට ලැබීම මා ලද මහත් භාග්‍යයකි.
මෙය පිං කටයුත්තක් පමණක්ම නොවේ. මෙය අපගේ ආගමික සංස්කෘතික උරුමය අඛණ්ඩව පවත්වා ගැනීමේ ජාතික වගකීමට උරදීමකි. බුදු සසුනේ ආරක්ෂා සහ අඛණ්ඩ පැවැත්ම සහතික කිරීම මාගේ ප්‍රමුඛතම යුතුකමක් බව මම සැමදා විශ්වාස කළෙමි.
මෙම මහා විහාර මන්දිරයේ කටයුතු සඳහා මූලිකත්වය ගෙන කටයුතු කරනු ලැබූ බේරුවල, මොරගොල්ල ශ්‍රී බුද්ධසිරි මහා විහාරාධිපති වහන්සේ ඇතුළු මහා සංඝරත්නයට මාගේ නමස්කාර පූර්වක ගෞරවය පිරිනමමි. බේරුවල මොරගොල්ල මහා විහාරයේ දායක සභාවේ සියලු දෙනා ඇතුළු ප්‍රදේශ වාසීන්ට ද, මෙම කටයුත්ත සඳහා දායක වූ සැමට ද මාගේ ගෞරවනීය ස්තුතිය පුද කරමි.
ඉතාමත් විචිත්‍ර ලෙස නිර්මාණය කර ඇති මෙම සංකස්සපුර ශ්‍රී සම්බුද්ධරාජ මහා විහාර මන්දිරයෙහි නිර්මාණ කටයුතු සඳහා සම්බන්ධ වූ සියලු ම නිර්මාණ ශිල්පීන් හට මාගේ ගෞරවය පුද කරීමට මෙය අවස්ථාවක් කර ගනිමි.
