සියලු ආගමික සහ සංස්කෘතික අනන්යතාවලට ගරු කරමින් මෙරට සෑම පුරවැසියෙකුටම නිදහසේ ජීවත් වීමේ අවස්ථාව ලබාදිය යුතු බවත්, අපේ රට කවර හෝ ජාතිවාදී උගුලකට හසුවීමට ඉඩ නොතබන බවත් ජනාධිපති අනුර කුමාර දිසානායක මහතා පවසනවා.
මෙම දෙසැම්බර් මස පැවැත්වීමට නියමිත ශ්රී ලාංකික දිනයේ දැනට සැලසුම් කර ඇති වැඩසටහන් පිළිබඳව විපක්ෂය නියෝජන කරන දෙමළ, මුස්ලිම් පක්ෂ නායකයින් සහ නියෝජිතයන් දැනුවත් කිරීම සහ අදහස්, යෝජනා ලබා ගැනීම වෙනුවෙන් ජනාධිපති කාර්යාලයේ පැවති හමුවට එක් වෙමින් ජනාධිපතිවරයා මේ බව සඳහන් කළා.
ප්රජාවන් අතර අවබෝධය වර්ධනය කරමින් සංහිඳියාවෙන් යුත් ශ්රී ලංකාවක් බිහි කිරීම යන දැක්ම පෙරදැරිව සියලු ජන කොටස් එක් කර ගනිමින් “ශ්රී ලාංකික දිනය” පැවැත්වීමට සැලසුම් කර තිබෙනවා.
සියලු ජාතීන් එක් කර ගනිමින් ශ්රී ලංකා දින සැමරුම සංවිධානය කිරීම, මීට සහභාගී වූ සියලු පක්ෂ නායකයන්ගේ සහ නියෝජිතයන්ගේ ඇගයීමට ලක්ව ඇති අතර ඔවුන් ද ඒ සම්බන්ධයෙන් සිය අදහස් සහ යෝජනා ඉදිරිපත් කළ බවයි ජනාධිපති මාධ්ය අංශය පැවසුවේ.
ජනාධිපති අනුර කුමාර දිසානායක මහතාගේ මඟපෙන්වීම මත රජය ක්රියාත්මක කර ඇති විෂ මත්ද්රව්ය ව්යසනය පරදන “රටම එකට” ජාතික මෙහෙයුමට සහ රට තුළ ජාතික සහ ආගමික සමගිය ගොඩනැඟීමේ වැඩපිළිවෙළට කොන්දේසි විරහිතව තම සහාය ලබා දෙන බවටද එහිදී එම නියෝජිතයෝ අවධාරණය කර තිබෙනවා.
බුද්ධ ශාසන, ආගමික සහ සංස්කෘතික කටයුතු අමාත්යාංශයේ මූලිකත්වයෙන් සංවිධානය කෙරෙන “ශ්රී ලාංකික දිනය” ජාතික වැඩසටහනේ සංවිධාන කටයුතු පිළිබඳ එ හිදී දීර්ඝ ලෙස සාකච්ඡා කළ බවයි ජනාධිපති මාධ්ය අංශය පැවසුවේ.
දේශපාලනික, ආගමික සහ සංස්කෘතික විවිධත්වයෙන් ඔබ්බට, පොදු වේදිකාවක සියලු දෙනාට එක්ව කටයුතු කළ හැකි පරිදි එම වැඩසටහන් සහ සැලසුම් නිර්මාණය කරන ලෙසයි ජනාධිපති අනුර කුමාර දිසානායක මහතා එහිදී සංවිධායක මණ්ඩලයට උපදෙස් ලබාදී ඇත්තේ.
