රුසියාව විසින් යුක්‍රේනයේ අගනගරය වන කියෙව් ඇතුළු නගර කිහිපයකට මිසයිල සහ ඩ්‍රෝන ප්‍රහාර එල්ල කර තිබෙනවා. පැය 13ක් පුරා පැවති එම ප්‍රහාරයෙන් පුද්ගලයින් 23 දෙනෙකු තුවාල ලැබූ බවයි වාර්තා වන්නේ. රුසියාව විසින් යුක්‍රේනයට ඩ්‍රෝන යානා 550ක් සහ මිසයිල 11ක් දියත් කර තිබෙනවා. මෙය රුසියාව විසින් යුක්‍රේනයට එල්ල කළ දැවැන්තම ඩ්‍රෝන ප්‍රහාරය බවයි වාර්තා වන්නේ. කියෙව් නගරයට ප්‍රහාර රැල්ලක් එල්ල වීමත් සමඟ පැය අටකට අධික කාලයක් ගුවන් ප්‍රහාර අනතුරු ඇඟවීම් නිකුත් වූ බවයි විදෙස් මාධ්‍ය සඳහන් කළේ. යුක්‍රේන ජනාධිපති වොලොඩිමියර් සෙලෙන්ස්කි පැවසුවේ මෙය මෙතෙක් රුසියාවෙන් එල්ල කළ දැවැන්ත ගුවන් ප්‍රහාරය වන බවයි. අමෙරිකාවේ ජනාධිපති ඩොනල්ඩ් ට්‍රම්ප් සහ රුසියානු ජනාධිපති ව්ලැඩිමීර් පුටින් අතර දුරකථන ඇමතුමකින් පැය කිහිපයකට පසු එම ප්‍රහාරය සිදු වී ඇති බවයි විදෙස් මාධ්‍ය පැවසුවේ. කෙසේවෙතත් මේ සම්බන්ධයෙන් අමෙරිකානු ජනාධිපතිවරයා සඳහන් කළේ යුක්‍රේනයට එරෙහි යුද්ධය අවසන් කිරීමට රුසියානු ජනාධිපතිවරයා සූදානම් නොවීම හේතුවෙන් තමන් දැඩි කලකිරීමට පත් ව සිටින බවයි.
Published
