විදෙස්ගතව සැගව සිටින සංවිධානාත්මක සහ පාතාල අපරාධකරුවන් 75 දෙනෙකුට ආසන්න ප්‍රමාණයකට රතු වරෙන්තු නිකුත් කර ඇති බව මහජන ආරක්ෂක අමාත්‍ය ආනන්ද විජේපාල මහතා පවසනවා. ඔවුන්ගෙන් 20 දෙනෙකුට අධික ප්‍රමාණයක් මේ වන විටත් දිවයිනට රැගෙනවිත් ඇති බවයි අමාත්‍යවරයා පැවසුවේ.

ආරක්ෂක අංශ සතු ගිනි අවි, තවදුරටත් පාතාල සහ සංවිධානාත්මක අපරාධකරුවන් අතට පත් වනවාද? සංවිධානාත්මක අපරාධකරුවන් අත්අඩංගුවට ගැනීම සඳහා නවීන තාක්ෂණය ද යොදා ගන්නා බවයි අපරාධ වාර්තා කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරි රුවන් කුමාර මහතා පැවසුවේ. වසරේ මේ දක්වා කාලය තුළ සිදු වූ වෙඩි තැබීමේ සිද්ධීන්වලින් පුද්ගලයින් 40 දෙනෙකු ජීවිතක්ෂයට පත්ව තිබෙනවා. එම වෙඩි තැබීම්වලට බලපා ඇති ප්‍රධාන හේතු දෙක සම්බන්ධයෙන් ද ජ්‍යෙෂ්ඨ පොලිස් අධිකාරි රුවන් කුමාර මහතා කරුණු පැහැදිලි කළා. මේ අතර ඉන්දුනීසියාවේ ජකර්තා නුවරදී පෙරේදා දිනයේ සංවිධානාත්මක අපරාධකරුවන් පස් දෙනෙකු, කාන්තාවක් සහ කුඩා දරුවෙකු ආරක්ෂක අංශ විසින් අත්අඩංගුවට ගනු ලැබුවා. ඒ, මෙරට විශේෂ පොලිස් කණ්ඩායමක් සහ ඉන්දුනීසියානු පොලිස් කණ්ඩායමක් එක්ව සිදුකළ මෙහෙයුමකදීයි. එලෙස අත්අඩංගුවට ගෙන තිබුණේ සංවිධානාත්මක අපරාධකරුවන් වන කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග, බැකෝ සමන්, තැඹිලි ලහිරු, බැකෝ සමන්ගේ බිරිඳ සහ කුඩා දරුවෙකුයි. ඔවුන් ඉදිරි දින කිහිපය තුළ දිවයිනට රැගෙන එන බවයි පොලිසිය පැවසුවේ.