දිවයිනට පැමිණි බැකෝ සමන්ගේ බිරිඳ සහ කුඩා දරුවා අපරාධ පරීක්ෂණ දෙපාර්තමේන්තු නිලධාරීන් පිරිසක් විසින් අත්අඩංගුවට ගෙන තිබෙනවා. බැකෝ සමන්ගේ බිරිඳ සහ කුඩා දරුවා පැමිණි ගුවන් යානයට වෙත ගොස් ඔවුන් එලෙස අත්අඩංගුවට ගත් බවයි නෙත් නිවුස් කටුනායක ගුවන් තොටුපොළ වාර්තාකරු පැවසුවේ. සංවිධානාත්මක අපරාධකරුවන් වන කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග, බැකෝ සමන්, තැඹිලි ලහිරු, බැකෝ සමන්ගේ බිරිඳ සහ කුඩා දරුවා පසුගියදා ඉන්දුනීසියාවේ ජකර්තා නුවරදී අත්අඩංගුවට ගෙන තිබුණා. ඒ, මෙරට විශේෂ පොලිස් කණ්ඩායමක් සහ ඉන්දුනීසියානු පොලිස් කණ්ඩායමක් එක්ව සිදුකළ මෙහෙයුමකදීයි. කෙසේවෙතත් බැකෝ සමන්ගේ බිරිඳ සහ කුඩා දරුවා එරට ආරක්‍ෂක අංශ විසින් පසුව මුදා හැර තිබුණා. ඒ අනුව බැකෝ සමන්ගේ බිරිඳ සහ කුඩා දරුවා ඉන්දුනීසියාවේ ජකර්තා නුවර සිට මෙරටට පැමිණීමෙන් පසු එලෙස අත්අඩංගුවට ගෙන තිබෙනවා. පසුව ඔවුන් වැඩිදුර විමර්ශන සඳහා කොළඹ අපරාධ පරික්‍ෂණ දෙපාර්තමේන්තු මූලස්ථානය වෙත භාර දුන් බවයි නෙත් නිවුස් කටුනායක ගුවන් තොටුපොළ වාර්තාකරු පැවසුවේ. මේ අතර ඉන්දුනීසියානු ආරක්‍ෂක අංශ භාරයේ පසුවන කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග, බැකෝ සමන සහ තැඹිලි ලහිරු මෙරටට රැගෙන ඒම සඳහා තවත් විශේෂ කණ්ඩායමක් දිවයිනෙන් පිටත් කර හැරීමට තීරණය කර තිබෙනවා. සැකකරුවන් මෙරටට රැගෙන ඒමේ රාජ්‍ය තාන්ත්‍රික කටයුතු මේ වන විටත් ආරම්භ වී ඇති බවයි පොලිසියේ ජ්‍යේෂ්ඨ ප්‍රකාශකයෙකු පැවසුවේ.