හිටපු ජනාධිපති රනිල් වික්‍රමසිංහ මහතාට පාර්ලිමේන්තු මන්ත්‍රී ධූරයක් ලබාදිය යුතු බවට මේ වන විට කතාබහක් මතුව තිබෙනවා. එක්සත් ජාතික පක්ෂය ඇතුළු පක්ෂ කිහිපයක් එක්ව පසුගිය මහමැතිවරණයට තරඟ වැදුණේ සිලින්ඩරය ලකුණ යටතේ නව ප්‍රජාතන්ත්‍රවාදී පෙරමුණෙන්. එම පෙරමුණට පසුගිය මහ මැතිවරණයෙන් ජාතික ලැයිස්තු මන්ත්‍රී ධුර දෙකක් හිමි වුණා. ඒ අනුව එක්සත් ජාතික පක්ෂයේ හිටපු උප නායක රවී කරුණානායක මහතා සහ ශ්‍රී ලංකා නිදහස් පක්ෂය නියෝජනය කළ ෆයිසර් මුස්තාෆා මහතා එම මන්ත්‍රී ධුර දෙක සඳහා පත් කිරීමටයි එම පක්ෂය පියවර ගනු ලැබුවේ. ඒ අනුව හිටපු ජනාධිපති රනිල් වික්‍රමසිංහ මහතාට යළි පාර්ලිමේන්තු මන්ත්‍රී ධුරයක් ලබාදෙන්නේ නම් එම පක්ෂයෙන් තේරී පත් වූ මන්ත්‍රීවරුන් දෙදෙනාගෙන් එක් අයෙකු ඉල්ලා අස්විය යුතු වනවා. එහෙත් ඒ සම්බන්ධයෙන් තීරණයක් ගත යුත්තේ නව ප්‍රජාතන්ත්‍රවාදී පෙරමුණ බවයි එහි නියෝජිතයෙකු නෙත් නිවුස් කළ විමසීමකදී පැවසුවේ. හිටපු ජනාධිපතිවරයාට පාර්ලිමේන්තුවේ මන්ත්‍රී ධුරයක් ලබාදිය යුතු බවට කිසිවෙකුත් සිය පක්ෂයෙන් මෙතෙක් ඉල්ලීමක් කර නොමැති බවද එම නියෝජිතයා පැවසුවා. එමෙන්ම හිටපු ජනාධිපති රනිල් වික්‍රමසිංහ මහතා ද තමන්ට පාර්ලිමේන්තු මන්ත්‍රී ධුරයක් ලබාදෙන ලෙසට සිය පක්ෂයෙන් මෙතෙක් ඉල්ලීම් කර නොමැති බවද නව ප්‍රජාතන්ත්‍රවාදී පෙරමුණ සඳහන් කළා. මේ අතර හිටපු ජනාධිපති රනිල් වික්‍රමසිංහ මහතාගේ දැනුමින් තවදුරටත් රටට සේවය ලබාගත යුතු බවයි හිටපු පාර්ලිමේන්තු මන්ත්‍රී ප්‍රේමනාත් සී දොලවත්ත මහතා පැවසුවේ.
මේ අතර රාජ්‍ය මුදල් අවභාවිත කිරීමේ චෝදනාව මත අත්අඩංගුවට ගෙන පසුව ඇප මත මුදාහැරුණු හිටපු ජනාධිපති රනිල් වික්‍රමසිංහ මහතා තවමත් කොළඹ ජාතික රෝහලේ දැඩිසත්කාර ඒකකයේ ප්‍රතිකාර ලබමින් සිටිනවා. ඔහු රෝහලෙන් පිටව යන දිනයක් සම්බන්ධයෙන් වෛද්‍යවරුන් තවමත් අවසන් තීරණයක් ගෙන නොමැති බවයි වාර්තා වන්නේ. Published
