හිටපු අමාත්‍ය රාජිත සේනාරත්න මහතා අද පෙරවරුවේ කොළඹ මහේස්ත්‍රාත් අධිකරණය හමුවේ පෙනි සිටීමට නියමිතව තිබෙනවා. ඔහුගේ පවුලේ සාමාජිකයෙකුද ඒ බව තහවුරු කළා. හිටපු අමාත්‍යවරයාට අධිකරණය හමුවේ පෙනී සිටින ලෙස දන්වා කොළඹ මහේස්ත්‍රාත් අධිකරණයේ අද දිනයේ පෙනී සිටින ලෙසටයි පසුගියදා නොතිසි ද නිකුත් කළේ. කොළඹ ප්‍රධාන මහේස්ත්‍රාත් තනූජා ලක්මාලි ජයතුංග මහත්මිය විසින් අපරාධ නඩු විධාන සංග්‍රහයේ 60 (1) වගන්තිය යටතේ “ප්‍රකාශනයක්” නිකුත් කරමින් මෙම නොතීසිය නිකුත් කරනු ලැබුවේ අල්ලස් කොමිසම විසින් කළ ඉල්ලීමක් සලකා බැලීමෙන් අනතුරුවයි. අල්ලස් කොමිසම විසින් ගොනු කළ මෝසමකට අනුව එම නඩුකරය කොළඹ ප්‍රධාන මහේස්ත්‍රාත්වරිය ඉදිරියේ පසුගිය 20 වනදා කැඳවනු ලැබුවා. එහිදී අල්ලස් කොමිසමේ දූෂණ විමර්ශන අංශයේ පොලිස් පරීක්ෂක එම්. විමලරත්න මහතාගෙන් සාක්ෂි සටහන් කර ගැනීම සිදු කෙරුණා. අල්ලස් කොමිසමේ සහකාර නීති අධ්‍යක්ෂ ජනරාල් සුලෝචනා හෙට්ටිආරච්චි මහත්මියගේ මෙහෙයවීම යටතේ සාක්ෂි දුන් පොලිස් පරීක්ෂක විමලරත්න මහතා, 2013 වසරේ ඔක්තෝබර් මස 25 වනදා කිරින්ද ධීවර වරායේ වැලි ඉවත් කිරීමේ කටයුතු කොරියානු සමාගමකට පැවරීමේදී සිදුවී ඇති අවිධිමත් ක්‍රියා සම්බන්ධයෙන් ලැබුණු නිර්නාමික පැමිණිල්ලකට අනුව මෙම විමර්ශනය ආරම්භ කළ බව සඳහන් කළා. කිරින්ද ධීවර වරායේ වැලි ඉවත්කර ඒවා පිරිසිදු කර වෙළෙඳපොළට මුදාහැරීමේ ව්‍යපෘතියක් ක්‍රියාත්මක කිරීම සඳහා කොරියානු සමාගමකට විධිමත් ක්‍රමවේදයෙන් බැහැරව ලබාදීම තුළින් රජයට රුපියල් ලක්ෂ 262ක පාඩුවක් සිදුවූ බව එම පැමිණිල්ල තුළින් සඳහන් කර තිබූ බවත් පොලිස් පරීක්ෂකවරයා සඳහන් කර සිටියා. ඒ අනුව විමර්ශන කටයුතු අවසන් කිරීමෙන් අනතුරුව එහි සැකකරුවන් වශයෙන් ධීවර වරාය නීතිගත සංස්ථාවේ හිටපු සභාපති උපාලි ලියනගේ සහ එවක ධීවර අමාත්‍යවරයා වශයෙන් කටයුතු කළ රාජිත සේනාරත්න යන මහත්වරුන් හඳුනා ගත් බවත් ඔහු පැවසුවා. මෙම නඩුකරයේ දෙවන සැකකරු වන රාජිත සේනාරත්න මහතාට ප්‍රකාශයක් ලබාදීම සඳහා ජුලි මස 02 වනදා අල්ලස් කොමිසම හමුවේ පෙනී සිටින ලෙස දන්වා ඉකුත් ජුනි මස 25 වනදා ලිපියක් යොමු කළ බව ඔහු කියා සිටියා. එහෙත් ප්‍රකාශයක් ලබාදීම සඳහා කොමිසම හමුවේ පෙනී නොසිටි රාජිත සේනාරත්න මහතා සිය නීතිඥවරුන් මාර්ගයෙන් අසනීප බව සඳහන් කරමින් සාවද්‍ය වෛද්‍ය වාර්තාවක් වශයෙන් සැලකිය හැකි බෙහෙත් වට්ටෝරුවක් පමණක් කොමිසමට ඉදිරිපත් කර තිබූ බවයි ඔහු එහිදී පවසා තිබුණේ. මෙම විමර්ශනයට අදාළව ප්‍රකාශ ලබාදීම රාජිත සේනාරත්න මහතා දිගින් දිගටම මගහරිමින් සිටීම හේතුවෙන් අල්ලස් කොමිෂන් සභාවෙන් ලබාගත් සෝදිසි වරෙන්තු දෙකක් මත තලාහේන, කොළඹ ඇන්ඩසන් පාර, ඇල්විටිගල මාවත, නුගේගොඩ සහ බේරුවල යන ප්‍රදේශවල පිහිටි ස්ථාන පහක් පරීක්ෂාවට ලක් කලද ඔහු සොයා ගැනීමට නොහැකි වූ බව පොලිස් පරීක්ෂකවරයා සාක්ෂි දෙමින් කියා සිටියා. එමෙන්ම රාජිත සේනාරත්න මහතාගේ සහ ඔහුගේ සමීපතයින්ගේ ජංගම දුරකථන අංක යොදා ගනිමින් බුද්ධි අංශ හරහා විමර්ශනයක් සිදු කළත් ඔහු දෛනිකව භාවිත කළ දුරකථනය විසන්ධි කර තිබූ බවත් ඔහු සඳහන් කර සිටියා. සැකකාර රාජිත සේනාරත්න මහතාගේ ප්‍රකාශයක් සටහන් කර ගැනීමට නොහැකිවීම නිසා මෙම නඩුකරයට අදාළ විමර්ශනය අවසන් කිරීමට නොහැකි තත්ත්වයක් උද්ගත වී ඇති බවත් ඒ අනුව අපරාධ නඩු විධාන සංග්‍රහයේ 60 (1) වගන්තිය යටතේ සැකකාර රාජිත සේනාරත්න මහතාට ප්‍රකාශයක් ලබාදෙන ලෙස බල කරන ප්‍රකාශනයක් නිකුත් කරන ලෙසත් සාක්ෂිකරු වැඩිදුරටත් අධිකරණයෙන් ඉල්ලා සිටියා. ඉන් අනතුරුව අල්ලස් හෝ දූෂණ චෝදනා විමර්ශන කොමිසමේ ප්‍රධාන පොලිස් පරීක්ෂක තුෂාර සම්පත් පුෂ්පකුමාර මහතාද සාක්ෂි ලබාදීම සිදු කළා. ප්‍රධාන පොලිස් පරීක්ෂකවරයාද සාක්ෂි දෙමින් සඳහන් කළේ සැකකාර රාජිත සේනාරත්න මහතාගේ සහ ඔහුගේ බිරිඳගේ ජංගම දුරකථන අංක ඔස්සේ විමර්ශන සිදු කළත් ඒවා විසන්ධි කර තිබූ බවයි.