අල්ලස් කොමිසම විසින් සිදු කරනු ලබන විමර්ශනයකට අදාළව අපරාධ පරීක්‍ෂණ දෙපාර්තමේන්තුවේ හිටපු අධ්‍යක්ෂ විශ්‍රාමික නියෝජ්‍ය පොලිස්පති රොහාන් ප්‍රේමරත්න මහතා මෙම අවස්ථාවේදී අත්අඩංගුවට ගැනීමේ අවශ්‍යතාවයක් මතු නොවන බව අල්ලස් කොමිසම අද කොළඹ මහේස්ත්‍රාත් අධිකරණයට දැනුම් දුන්නා. අල්ලස් කොමිසම විසින් තමන්ව අත්අඩංගුවට ගැනීමට පෙර අපේක්ෂිත ඇපයක් මත මුදා හරිණ ලෙස ඉල්ලා රොහාන් ප්‍රේමරත්න මහතා විසින් ඉදිරිපත් කළ අපේක්ෂිත ඇප පෙත්සමක් අද කැඳවූ අවස්ථාවේදී අල්ලස් කොමිසම වෙනුවෙන් පෙනී සිටි නිලධාරියා මේ බව දැනුම් දුන්නා. ඒ අනුව කොළඹ අතිරේක මහේස්ත්‍රාත් හර්ෂණ කැකුණවල මහතා පෙත්සම්කාර ප්‍රේමරත්න මහතාගේ නීතිඥවරයාට දැනුම් දුන්නේ ලබන 04 වනදා අල්ලස් කොමිසමට ගොස් ප්‍රකාශයක් ලබා දෙන ලෙස හිටපු නියෝජ්‍ය පොලිස්පතිවරයාට දැනුම් දෙන ලෙසයි. මෙම අපේක්ෂිත ඇප ඉල්ලීම අද කැඳවූ අවස්ථාවේදී අල්ලස් කොමිසම වෙනුවෙන් පෙනී සිටි නිලධාරියා අධිකරණය හමුවේ කරුණු දක්වමින් තම කොමිසම විසින් සිදු කරනු ලබන විමර්ශනයකට අදාළව ප්‍රකාශයක් ලබාදීම සඳහා ඉකුත් 15 වනදා පෙනී සිටින ලෙස පෙත්සම්කරුට දැනූම් දී තිබුණද ඔහු පෙනී නොසිටි බවයි. එදින ඔහු අත්අඩංගුවට ගැනීමේ අවශ්‍යතාවයක් නොතිබූ බව සඳහන් කළ එම නිලධාරියා ඔහුට යලි ලබන 04 වනදා පෙනී සිටින ලෙස දන්වා ඇති අතර එදිනද ඔහු අත්අඩංගුවට ගැනීමේ අවශ්‍යතාවයක් නොමැති බවත් සඳහන් කර සිටියා. මෙහිදී පෙත්සම්කාර හිටපු නියෝජ්‍ය පොලිස්පතිවරයා වෙනුවෙන් පෙනී සිටි නීතිඥ සරින්ද ජයවර්ධන මහතා දිනපතා පුවත්පතක් මහේස්ත්‍රාත්වරයාට පෙන්වමින් සදහන් කළේ සිය සේවාදායකයා අත්අඩංගුවට ගැනීම සඳහා අල්ලස් කොමිසම හතර වතාවක් සිය සේවා දායකයාගේ නිවසට ගිය බවට එම පුවත්පත වාර්තා කර තිබෙන බවයි. එම චෝදනාව ප්‍රතික්ෂේප කළ අල්ලස් කොමිසමේ නිලධාරියා සදහන් කළේ පෙත්සම්කරු මේ අවස්ථාවේදී අත් අඩංගුවට ගැනීමේ අවශ්‍යතාවයක් නොමැති බවයි. එම අවස්ථාවේදී අතිරේක මහේස්ත්‍රාත්වරයා පෙත්සම්කාර පාර්ශ්වයේ නීතිඥවරයාට ප්‍රකාශ කළේ මෙම අවස්ථාවේදී අත්අඩංගුවට ගැනීම සම්බන්ධයෙන් ගැටලුවක් මතු නොවන බැවින් ලබන 04 වනදා පෙත්සම්කරුට අල්ලස් කොමිසමට ගොස් ප්‍රකාශයක් ලබා දෙන ලෙසයි. ඉන් අනතුරුව අදාළ පෙත්සම අගෝස්තු මස 26 වනදා කැදවන ලෙසත් අතිරේක මහේස්ත්‍රාත් වරයා නියෝග කළා.