16 වන ඉන්දීය-ජපාන වාර්ෂික සමුළුවට සහභාගී වීම සඳහා තෙදින නිල සංචාරයක් සනිටුහන් කරමින් ජපාන අග්රාමාත්ය සනායේ ටකායිචි නවදිල්ලියට පැමිණියාය.
මෙම සංචාරයේදී ආර්ථික ආරක්ෂාව, ශක්තිමත් සැපයුම් දාමයන් ගොඩනැගීම, නැඟී එන තාක්ෂණයන්, ආරක්ෂක මෙන්ම සාගර ආරක්ෂණ ක්ෂේත්රයන්හි සහයෝගීතාව තවදුරටත් ගැඹුරු කර ගැනීමට දෙරටම අපේක්ෂා කරයි.
ජපාන අග්රාමාත්යවරිය ලෙස ඇය ඉන්දියාවේ සිදු කරන මෙම ප්රථම නිල සංචාරය ඉන්දීය අග්රාමාත්ය නරේන්ද්ර මෝදි විසින් ඉතා උණුසුම් අයුරින් පිළිගනු ලැබීය.
මේ සම්බන්ධයෙන් 'X' සමාජ මාධ්ය ගිණුමේ සටහනක් තබමින් මෝදි කියා සිටියේ, "ජපාන අග්රාමාත්ය සනායේ ටකායිචි, ඉන්දියාවට සාදරයෙන් පිළිගනිමු. ඔබගේ පළමු ඉන්දීය සංචාරය අපි ඉතා අවංකවම අගය කරමු. ජපාන-ඉන්දීය විශේෂ උපායමාර්ගික සහ ගෝලීය හවුල්කාරිත්වය තවදුරටත් ශක්තිමත් කිරීම වෙනුවෙන් පුළුල් පරාසයක ක්ෂේත්රයන් ඔස්සේ අදහස් හුවමාරු කර ගැනීමට මම බලාපොරොත්තු වෙමි. ඉන්දු-පැසිෆික් කලාපයේ සහ ඉන් ඔබ්බෙහි සාමය, ස්ථාවරත්වය සහ සමෘද්ධිය උදෙසා දායක වීමට දෙරට අඛණ්ඩව සහයෝගයෙන් කටයුතු කරනු ඇත," යනුවෙනි.
ගුවන් තොටුපළ වෙත ළඟා වූ ජපාන අග්රාමාත්යවරියව පිළිගැනීම සඳහා ඉන්දීය විද්යා හා තාක්ෂණ රාජ්ය අමාත්ය ජිතේන්ද්ර සිං පැමිණ සිටියේය.
මේ අතර, ඉන්දීය විදේශ කටයුතු අමාත්යාංශයේ මාධ්ය ප්රකාශක රන්දීර් ජයිස්වාල් ද ජපාන අගමැතිනිය සාදරයෙන් පිළිගත් අතර, ඇයගේ මෙම සංචාරය ඉන්දියා-ජපාන විශේෂ උපායමාර්ගික සහ ගෝලීය හවුල්කාරිත්වය ඉදිරියට ගෙනයාමේ තවත් සුවිශේෂී සන්ධිස්ථානයක් වනු ඇති බව ප්රකාශ කළේය.
අග්රාමාත්ය නරේන්ද්ර මෝදිගේ විශේෂ ආරාධනයකට අනුව ජූලි 1 වැනිදා සිට ජූලි 3 වැනිදා දක්වා ක්රියාත්මක වන මෙම සංචාරය, ටකායිචි ධුරයට පත්වීමෙන් පසු ඉන්දියාවේ සිදු කරන පළමු නිල සංචාරයයි.
සිය සංචාරය අතරතුර ජපාන අග්රාමාත්යවරිය, අගමැති මෝදි සමඟ ද්විපාර්ශ්වික රාජ්ය තාන්ත්රික සාකච්ඡා පැවැත්වීමට අමතරව, 'ඉන්දු-ජපාන ව්යාපාරික සංසදයට' සහභාගී වීමට සහ දෙරටේ ප්රමුඛ පෙළේ ව්යාපාරික නායකයින් සමඟ සුහද සාකච්ඡාවල නිරත වීමටද නියමිතව ඇත.
