ලොව විශාලතම ක්‍රිප්ටෝකරන්සි (Cryptocurrency) හුවමාරු ආයතනය වන බයිනෑන්ස් (Binance) හි සිදුවූ ඩොලර් බිලියන 6.3ක (පවුම් බිලියන 4.7) දැවැන්ත සයිබර් මංකොල්ලය පිටුපස උතුරු කොරියානු රාජ්‍ය අනුග්‍රහය ලබන හැකර් කණ්ඩායමක් සිටින බවට ප්‍රබල බුද්ධි තොරතුරු ලැබී ඇති බව ප්‍රමුඛ පෙළේ බ්ලොක්චේන් විශ්ලේෂණ ආයතන දෙකක් ප්‍රකාශ කරනවා.
TRM Labs සහ Chainalysis යන ආයතන විසින් මෙම ප්‍රහාරය පිටුපස 'TraderTraitor' ලෙසද හඳුන්වන උතුරු කොරියාවේ 'ලසරස්' (Lazarus Group) හැකර් කණ්ඩායම සිටින බව ඉහළ විශ්වාසනීයත්වයකින් යුතුව හඳුනාගෙන තිබෙනවා.
උතුරු කොරියානු නායක කිම් ජොං උන්ගේ රජය තම කටයුතු සඳහා අරමුදල් සපයා ගැනීමට මෙලෙස සයිබර් අපරාධ මත යැපෙන බවට විදේශීය විශේෂඥයින් චෝදනා කළද, ප්යොංයැං (Pyongyang) පාලනය එම චෝදනා දිගින් දිගටම ප්‍රතික්ෂේප කරනු ලබනවා.
ලොව දිළිඳුම රටක් වන මෙන්ම අන්තර්ජාල පහසුකම් දැඩි ලෙස සීමා කර ඇති උතුරු කොරියාවට එල්ල වූ නවතම චෝදනාව මෙය වන අතර, මීට පෙර 2014 වසරේදී සෝනි පික්චර්ස් (Sony Pictures) ආයතනයට එල්ල වූ ප්‍රහාරය මෙන්ම 2022 වසරේ සිදුවූ ඩොලර් මිලියන 620ක ක්‍රිප්ටෝ සොරකම පිටුපසද මොවුන් සිටින බවටයි සැක කෙරෙන්නේ.
මෙම නවතම මංකොල්ලයේදී, හැකර්වරුන් විසින් විශේෂ බලපත්‍රයක් (Special authorisation) භාවිත කරමින් බයිනෑන්ස් ආයතනයේ අන්තර්ජාලයට සම්බන්ධ 'Hot wallet' එකක තිබූ මුදල්, ප්‍රහාරකයා වෙත ස්වයංක්‍රීයවම මාරුවන ලෙස සකස් කර ඇති බව සඳහන්.
මෙලෙස සොරාගන්නා ලද ඩිජිටල් වත්කම් ඉක්මනින්ම බිට්කොයින් (Bitcoin) සහ වෙනත් ඩිජිටල් වත්කම් බවට පරිවර්තනය කර, අවසානයේ ඒවා නීත්‍යානුකූල මුදල් (Hard currency) බවට පත්කර ගැනීමට මෙම හැකර් කණ්ඩායම කටයුතු කර ඇති බව ඇමෙරිකානු FBI ආයතනය පෙන්වා දෙනවා.
විශ්ලේෂණ වාර්තාවලට අනුව උතුරු කොරියාව සිය විශ්වවිද්‍යාලවල සිටින දක්ෂතම සිසුන් තෝරාගෙන, රාජ්‍ය බුද්ධි අංශ මගින් මෙහෙයවන හැකර් කණ්ඩායම් වෙත යොමු කරමින් මෙවැනි සයිබර් මෙහෙයුම් ක්‍රමානුකූලව වර්ධනය කර තිබෙනවා.
මින් වැඩි ප්‍රමාණයක් මුදල් උපයා ගැනීමේ අරමුණින් සිදුකෙරෙන අතර, ඇතැම් සයිබර් ප්‍රහාර චීන සීමාව ආසන්නයේ සිට මෙහෙයවන බවයි වැඩිදුරටත් අනාවරණය වී ඇත්තේ.
