Published
ජාත්‍යන්තර මූල්‍ය අරමුදලෙන් මේ වන විට රටට අමෙරිකානු ඩොලර් බිලියන 1.74ක මුදලක් ලැබී ඇති බව රාජ්‍ය මූල්‍ය ප්‍රතිපත්ති දෙපාර්තමේන්තුව පවසනවා. එහි අධ්‍යක්ෂ ජනරාල් කපිල සේනානායක මහතා පැවසුවේ ජාත්‍යන්තර මූල්‍ය අරමුදලින් ශ්‍රී ලංකාව ඉල්ලුම් කළ ණය මුදල වාරික 9කින් මෙරටට ලැබීමට නියමිත අතර එහි වාරික 5ක් මේ වන විට ලැබී ඇති බවයි. ඒ අනුව 05 වන වාරිකය ලෙස අමෙරිකානු ඩොලර් මිලියන 350ක් පසුගිය ජූලි 03 වනදා හිමි වී තිබෙනවා.
ඉදිරි කාලය තුළදී උද්ධමනය සියයට 5 මට්ටමේ පවත්වා ගැනීමට ශ්‍රී ලංකා මහ බැංකුව උත්සහ දරමින් සිටින බවද අධ්‍යක්ෂ ජනරාල් කපිල සේනානායක මහතා පැවසුවා. ඔහු මෙම අදහස් පළ කළේ ජාත්‍යන්තර මූල්‍ය අරමුදලේ විස්තීරණ ණය පහසුකම් සම්බන්ධයෙන් වන වත්මන් තත්ත්වය පැහැදිළි කිරීම සඳහා රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවට එක්වෙමින්. ජාත්‍යන්තර මූල්‍ය අරමුදලේ නියෝජිතයින්ට යම් කණ්ඩායමක් විසින් අසත්‍ය තොරතුරු ලබැ දුන්නා යැයි සමාජ මාධ්‍යයේ පැතිර යන තොරතුරු සම්බන්ධයෙන්ද මුදල් අමාත්‍යංශ ලේකම්වරයා කරුණු දැක්වුවා.
