ඉදිකිරීම් සහ ඉඩම් පරිහරණය, කෘෂිකර්මාන්තය සහ සත්ත්ව පාලනය, පරිසර සංරක්ෂණය ආදී ක්ෂේත්රවලට අදාළ ආයතන වියුක්තව ක්රියාත්මක වීම දිට්වා සුළි කුණාටුවෙන් විනාශයට පත් මධ්යම කඳුකරය යථා තත්ත්වයට පත් කිරීමේදී බාධාවක් බව ජනාධිපති අනුර කුමාර දිසානායක මහතා පවසනවා.
මධ්යම කඳුකරය සුරක්ෂිත කර, නැවත වනවගා කිරීම පිළිබඳ ආසියානු සංවර්ධන බැංකුව, එක්සත් ජාතීන්ගේ සංවර්ධන වැඩසටහන සහ අදාළ රාජ්ය සහ පෞද්ගලික ආයතන නියෝජිතයන් සමඟ ජනාධිපති කාර්යාලයේදී පැවති සාකච්ඡාවකට එක්වෙමින් ජනාධිපතිවරයා මේ බව කියා සිටියා.
මධ්යම කඳුකරය කඩිනමින් සුරක්ෂිත කර යළි ගොඩනැගීම වෙනුවෙන් අදාළ සියලු පාර්ශ්ව ඒකාබද්ධ කරගත් නව ව්යුහයක් ස්ථාපිත කිරීමට කටයුතු කරන බවයි ජනාධිපතිවරයා එහිදී පවසා ඇත්තේ.
දිට්වා සුළි කුණාටුව හේතුවෙන් මධ්යම කඳුකරයේ නායයාම් 4,000කට ආසන්න ප්රමාණයක් සිදුව ඇති බවත්, දීර්ඝ කාලයක් පුරා සිදු වූ අවිධිමත් ඉදිකිරීම්, වගා කටයුතු සහ නඩත්තු නොකිරීම් ඊට හේතු වී ඇති බවත් මෙහිදී අවධාරණය කෙරුණා.
මධ්යම කඳුකරය සුරක්ෂිත කර, මතු පරපුරට දායාද කිරීම වෙනුවෙන් කඩිනම් ජාතික ප්රතිපත්තියක අවශ්යතාවද ජනාධිපති අනුර කුමාර දිසානායක මහතා එහිදී අවධාරණය කළ බවයි ජනාධිපති මාධ්ය අංශය සඳහන් කළේ.
ඊට අදාළ පනත් මගින් බලාත්මක කරන ලද අධිකාරියක අවශ්යතාව පිළිබඳවද මෙහිදී සාකච්ඡා කෙරුණු අතර, එම කටයුතු කඩිනමින් සිදු කරන ලෙස ජනාධිපති අනුර කුමාර දිසානායක මහතා මෙහිදී නිලධාරීන්ට උපදෙස් දී තිබෙනවා.
එම කටයුතු සඳහා මූල්ය අරමුදලක් පවත්වාගෙන යාමේ අවශ්යතාව මෙහිදී පෙන්වා දුන් ආසියානු සංවර්ධන බැංකුවේ සහ එක්සත් ජාතීන්ගේ සංවර්ධන වැඩසටහනෙහි නියෝජිතයින් මධ්යම කඳුකරය යළි ගොඩනැගීම වෙනුවෙන් ශ්රී ලංකාවට අවශ්ය පූර්ණ සහාය ලබා දෙන බවයි ප්රකාශ කර ඇත්තේ.
