අද වන විට රට තුළ නිර්මාණය වී තිබෙන තත්ත්වය සෑම අතකින්ම ව්‍යාකූල වී ජන සමාජය කියන පිරමීඩයේ පහළම තලයේ සිට ඉහළ තලය දක්වාත් ඉහළ තලයේ සිට පහළ තලය දක්වාත් සෑම අතකින්ම රටේ ක්‍රියාත්මක වන්නේ පීඩාකාරි රාජ්‍ය පාලනයක් බව විපක්ෂ නායක සජිත් ප්‍රේමදාස මහතා පවසනවා.
ජනතාවගේ කර පිට පීඩනය අසහනය පැටවීම නිසා මේ මොහොත වන විට රටේ දුප්පත්කම 50% දක්වා වර්ධනය වී ඇති බවත් බරපතලම ගැටලුව වන්නේ 2028 ණය ගෙවීම බවත් විපක්ෂ නායකවරයා සඳහන් කර සිටියා.
විපක්ෂ නායක සජිත් ප්‍රේමදාස මහතා මේ බව කියා සිටියේ ගමින් ගමට දොරින් දොරට විපක්ෂ නායක ජංගම සේවාව යටතේ මතුගම නගර සභා ශ්‍රවණාගාරයේ දි මතුගම ප්‍රදේශයේ ජනතා ගැටලු සොයා බැලීම සහ සමගි ජන බලවේගයේ සාමාජික ප්‍රවර්ධනය සඳහා වන ජන හමුවක් හා එක්වෙමිනි.
වාර්ෂිකව ඇ. ඩොලර් බිලියන 5ක ණය ගෙවීමට නම් විදේශ සංචිත ඉහළ මට්මක පැවැතිය යුතු බවත් අප රටට ඇති ප්‍රේෂණ ඉහළ මට්ටමක තිබිය යුතු බවත් ඊට අමතරව 5%ක අවම ආර්ථික වර්ධන වේගයක් අවශ්‍ය බවත් විපක්ෂ නායක සජිත් ප්‍රේමදාස මහතා පැවසීය.
ආර්ථික විශේෂඥයන් අනතුරු අගවන ආකාරයට රටට එන සෘජු විදේශ ආයෝජන, අපනයන ප්‍රවර්ධනය, ආර්ථික වර්ධනය ප්‍රමාණවත් නොමැති බවට පවසන බවත් දුප්පත්කම වැඩි වී ජනතාවගේ අතේ ඇති මුදල් ප්‍රමාණය අඩුවන බවත් එවිට පාරිභෝජනය ආයෝජනය නිෂ්පාදනය, අපනයනය හා ඉතිරි කිරීම අඩුවන බවත් මේ සියල්ල ඉහළ මට්ටමක පවත්වාගෙන යාමට නම් ආර්ථික වර්ධන වේගය ඉහළ යා යුතු බවත් විපක්ෂ නායකවරයා පැවසීය.
අද වන විට ක්ෂුද්‍ර කුඩා හා මධ්‍ය පරිමාණ කර්මාන්තකරුවන් අසරණ වී ව්‍යාපාරිකයන්ගේ සම්පත් දේපල වෙන්දේසි වන බවත් ජනාධිපතිවරණ මහමැතිවරණය සහ පළාත් පාලන මැතිවරණය නිසා මේ වෙන්දේසිය නතර කළත් ඔවුන්ගේ ණය ප්‍රතිව්‍යුහගත නොකළ බවත් පසුගිය රජයත් මේ රජයත් කළේ ඡන්ද ලබා ගැනීමට වෙන්දේසිය නතර කිරීම බවත් සඳහන් කර සිටියා.
මේ වසරේ දෙසැම්බර් 31 වන විට මේ ණය මර උගුලේ තෙරපී ඇති ව්‍යාපාරික පන්තිය ණය නොගෙවීමේ හැකියාව තුළ ඔවුන්ගේ සම්පත් දේපල සියල්ල වෙන්දේසි වන බවත් එය වන විට අප රටේ ආර්ථිකයට මරු පහරක් එල්ල වන බවත් විපක්ෂ නායකවරයා පැවසීය.තවද මේ රජයට ආර්ථිකය වර්ධනය කරන්නට හැකියාවක් පැහැදිලි වැඩපිළිවෙළක් කණ්ඩායමක් දැක්මක් නොමැති බවත් ආර්ථික සැලසුමක් නොමැති නිසා රට ඉබාගාතේ යන බවත් 2028 වන විට මහා භයානක අවධානම් තත්ත්වයක් නිර්මාණය විය හැකි බවත් අද රටට ලැබෙන්නේ සෘජු විදේශ ආයෝජනවලින් තුනෙන් එකක් බවත් පවසා සිටියා.
ඉතිරි තුනෙන් දෙක නොලැබී යන බවට ජාත්‍යන්තර මූල්‍ය ආයතන අනතුරු අගවන බවත් මේ ඉලක්ක සම්පූර්ණ කර ගත නොහැකි වුවහොත් ණය ගෙවා ගත නොහැකිව නැවත වරක් බංකොලොත් වන බවත් විපක්ෂ නායකවරයා පැවසීය.
මේ රට 2022 වගේ තත්ත්වයට වැටෙනවාට තමා කැමති නොවන බවත් ඒ තත්ත්වයට නොවැටෙන්න නම් මීට වඩා වැඩි වේගයකින් ආර්ථිකය වර්ධනය වී අපනයන ප්‍රවර්ධනය වී ජාතික ආර්ථික සැලසුමක් තිබිය යුතු බවත් අවංකවම වත්මන් රජයට එවැනි සැලසුමක් නොමැති බවත් විපක්ෂ නායකවරයා වැඩිදුරටත් පැවසීය.
තමා පසුගිය දිනක ගෙවිය යුතු ණය, ඒ සදහා අවශ්‍ය ආර්ථික වර්ධන වේගය සෘජු විදේශ ආයෝජන ගැන පාර්ලිමේන්තුවේ ප්‍රශ්නයක් ඇහුවත් තවමත් රජයෙන් උත්තර නොමැති බවත් 2028 ණය ගෙවීම ගැන ප්‍රශ්න අහන කොට රජය ඒවාට උත්තර දෙන්න කල් ඉල්ලනවා නම් ඒ අයට මේ ගැටලුවට උත්තර සපයන්න නොතේරෙන බවත් හරි දැක්මක් දර්ශනයක් ඇත් නම් මේවට උත්තර දෙන්න කල් අවශ්‍ය නොවන බවත් විපක්ෂ නායකවරයා පැවසීය.
