සෑම දරුවෙකුටම ගුණාත්මක අධ්‍යාපනයක් තහවුරු වන පරිදි මෙරට පාසල් පද්ධතිය විධිමත් කිරීම සහ විෂයමාලා ප්‍රතිසංස්කරණය පිළිබඳ ප්‍රමුඛ අවධානය යොමු කරන ලෙස ජනාධිපති අනුර කුමාර දිසානායක මහතා අධ්‍යාපන අමාත්‍යාංශයේ නිලධාරීන්ට උපදෙස් ලබා දී තිබෙනවා. එමෙන්ම රජයේ අධ්‍යාපන ප්‍රතිසංස්කරණවල අපේක්ෂිත ඉලක්ක සපුරා ගැනීම වෙනුවෙන් කළ යුතු ආයෝජන නිසි පරිදි සිදු කරන ලෙසද ජනාධිපතිවරයා එම නිලධාරීන්ට උපදෙස් ලබා දුන් බවයි ජනාධිපති මාධ්‍ය අංශය පැවසුවේ. ඒ, ජනාධිපති කාර්යාලයේදී පැවති අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ 2026 වසරේ පූර්ව අයවැය සාකච්ඡාවේදීයි. දිවයින පුරා විසිරී තිබෙන වෘත්තීය අධ්‍යාපන වැඩසටහන් වෙනුවට, අධ්‍යාපන අමාත්‍යාංශයේ වෘත්තීය අධ්‍යාපන අංශයේ මැදිහත්වීමෙන් ජාතික වෘත්තීය අධ්‍යාපන සැලැස්මක් සකස් කරන ලෙසද ජනාධිපතිවරයා එහිදී උපදෙස් ලබා දී තිබෙනවා. අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශට 2025 වසරේ වෙන් කෙරුණු අයවැය ප්‍රතිපාදන මත සාමාන්‍ය අධ්‍යාපන, උසස් අධ්‍යාපන සහ වෘත්තීය අධ්‍යාපන යන අංශ 03යටතේ ක්‍රියාත්මක ව්‍යාපෘතිවල ප්‍රගතිය, මතුව ඇති ගැටලු සහ අභියෝග පිළිබඳව එහිදී වෙන් වෙන් වශයෙන් සාකච්ඡා කළ බවයි ජනාධිපති මාධ්‍ය අංශය පැවසුවේ. “ශ්‍රී ලාංකික අනන්‍යතාව බෙදා ගන්නා දක්ෂ පුරවැසියන් තුළින් ගෝලීය සමාජයේ විශිෂ්ටත්වය කරා ළඟා වීම” යන දැක්ම යටතේ වන අධ්‍යාපන අමාත්‍යාංශයේ ඉදිරි සැලසුම් පිළිබඳවද එහිදී පුළුල් අවධානය යොමු වී තිබෙනවා. විදේශ ආධාර යටතේ පාසල් පද්ධතිය තුළ ක්‍රියාත්මක වන ව්‍යාපෘති පිළිබඳවද සාකච්ඡා කෙරුණු අතර සාමාන්‍ය අධ්‍යාපන නවීකරණ ව්‍යාපෘතිය, ද්වීතියික අධ්‍යාපන ආංශික සංවර්ධන ව්‍යාපෘතිය ආදී ව්‍යාපෘතිවල ප්‍රගතිය අධ්‍යාපන අමාත්‍යාංශ නිලධාරීන් විසින් ජනාධිපතිවරයා වෙත ඉදිරිපත් කළ බවයි ජනාධිපති මාධ්‍ය අංශය සඳහන් කළේ. දීර්ඝ කාලයක් පුරා පාසල්වල ක්‍රියාත්මක වන ව්‍යාපෘති යාවත්කාලීන කිරීමේ අවශ්‍යතාවද ජනාධිපතිවරයා එහිදී පෙන්වා දී තිබෙනවා. ප්‍රාථමික පාසල් සංවර්ධනය ඇතුළු පාසල් සංවර්ධන වැඩසටහන් පිළිබඳවද ජනාධිපතිවරයාගේ විශේෂ අවධානය යොමු වූ බවයි ජනාධිපති මාධ්‍ය අංශය සඳහන් කළේ. එමෙන්ම පාසල් පෝෂණ ආහාර වැඩසටහන, ශිෂ්‍යාධාර, පෙළපොත් සහ නිලඇදුම් ලබා දීමේ වැඩසටහන් පිළිබඳව මෙන්ම, සුරක්ෂා රක්ෂණ යෝජනා ක්‍රමය ඇතුළු සුබසාධන වැඩසටහන්වල ප්‍රගතියද පිළිබඳවද එහිදී සාකච්ඡා කර තිබෙනවා.