ඉකුත් පළාත් පාලන ඡන්ද විමසීමේදී කැකිරාව ප්‍රාදේශීය සභාව සඳහා සමානුපාතික නියෝජන ක්‍රමය යටතේ සමගි ජන බලවේගය විසින් ලබාගත් ආසන සඳහා කාන්තා මන්ත්‍රීවරියන් නම් කරන ලෙස ඉල්ලා කැකිරාව මැතිවරණ තේරීම්භාර නිලධාරියා විසින් නිකුත් කර තිබෙන ලිපිය ක්‍රියාත්මක කිරීම වළක්වාලමින් අභියාචනාධිකරණය විසින් අද අතුරු තහනම් නියෝගයක් නිකුත් කළා.
සමගි ජන බලවේගේ සාමාජිකයින් දෙදෙනෙකු වන චන්දිම ගමගේ සහ අයි.එම්..පී.කේ. ඉලංගසිංහ විසින් ඉදිරිපත් කළ පෙත්සමක් සලකා බැලීමෙන් අනතුරුව අභියාචනාධිකරණ විනිසුරු ගිහාන් කුලතුංග මහතා විසින් මෙම නියෝගය නිකුත් කළා.
මෙම අතුරු තහනම් නියෝගය ජුනි 16 වන දින දක්වා බලපැවැත්වෙන බවත් අධිකරණය නිවේදනය කළා.
පෙත්සම්කරුවන් කියා සිටින්නේ සමගි ජන බලවේගය විසින් කැකිරාව ප්‍රාදේශීය සභාවේ ආසන හතරක් දිනාගත් බවත් ඉන් ආසන තුනක් සමානුපාතික නියෝජනය යටතේ ලබාගෙන තිබෙන බව තේරීම් භාර නිලධාරියා විසින් පක්ෂයේ මහ ලේකම්වරයාට දැනුම් දී බවයි.
සමානුපාතික නියෝජනය යටතේ ලබාගත් එම ආසන තුන සඳහා අතිරේක නාමයෝජනා ලැයිස්තුවේ හෝ මූලික නාමයෝජනා පත්‍රයේ නම් සඳහන් කාන්තා සාමාජිකාවන් පත් කළ යුතු බවට තේරීම් භාර නිලධාරියා අදාල ලිපිය මගින් සඳහන් කර ඇති බවත් පෙත්සම්කරුවන් පවසනවා.
සමානුපාතික නියෝජනය යටතේ ලබාගත් ආසන තුන සඳහා කාන්තා සාමාජිකාවන්
පත් කරන ලෙස තේරීම් භාර නිලධාරියා විසින් ගනු ලැබූ තීරණය පොලක් පාලන ඡන්ද විමසීම පනතේ විධිවිධාන වලට පටහැනි බවත් එය බල රහිත කිරීමේ තීන්දුවක් ලබාදෙන ලෙසත් පෙත්සම්කරුවන් අභියාචනාධිකරණයෙන් වැඩිදුරටත් ඉල්ලා තිබෙනවා.
