කැකිරාව නගරාසන්නයේ පිහිටි ප්‍රසිද්ධ පාසලක 6 වැනි වසරේ ඉගෙනුම ලබන 11 හැවිරිදි පාසැල් සිසුවියක් හදිසියේ ඇති වූ රෝගාබාධයක් හේතුවෙන් රෝහල් ගත කිරීමෙන් පසු මිය ගොස් තිබෙනවා. කැකිරාව පොලිසිය පැවසුවේ එම සිසුවිය පාසල නිමවී නිවසට යාම සඳහා සිය පාසල් සේවා බස් රථය පැමිණෙන තෙක් මාර්ගය අසළ රැදී සිටි අවස්ථාවේ සිහිසුන්ව ඇද වැටී ඇති බවයි. සිහිසුන් වූ එම සිසුවිය පාසල් සේවා බස්රථයක් මඟින් කඩිනමින් කැකිරාව දිසා රෝහලට ඇතුළත් කිරීමට පාසැල් සේවා බස්රථ රියදුරකු ඇතුළු පිරිසක් කටයුතු කර තිබෙනවා. බරපතළ තත්වයේ සිටි එම සිසුවිය රෝහල් ගතකිරීමේදී මිය ගොස් ඇති බවයි පොලීසිය පැවසුවේ. එලෙස මිය ගොස් ඇත්තේ සීගිරිය, තල්කොටේ ප්‍රදේශයේ පදිංචිව සිටි වයස අවුරුදු 11ක් වූ 06 වැනි වසරේ ඉගෙනුම ලබන පාසල් සිසුවියක්. ඉකුත් වසරේ පැවැති ශිෂ්‍යත්ව කඩ ඉම් විභාය සමත් වීමෙන් පසු ඇය වැඩිදුර අධ්‍යාපනය සඳහා කැකිරාව නගරාසන්නයේ පිහිටි මෙම ජනප්‍රිය පාසලට ඇතුළත් කර ඇත්තේ මීට මාස එක හමාරකට පමණ ඉහතදී බවයි වාර්තා වුණේ. එම සිසුවියගේ මරණය සම්බන්ධයෙන් වූ හදිසි මරණ පරීක්ෂණය පවත්වා ඇති අතර ඇයගේ දේහය සම්බන්ධයෙන් අධීකරණ වෛද්‍ය පරීක්ෂණයක් පැවැත්වීමට නියමිතව තිබෙනවා.