දක්ෂිණ අධිවේගී මාර්ගයේ සිදුවූ අනතුරකින් කාන්තාවන් දෙදෙනෙකු මියගොස් තවත් පුද්ගලයින් 04 දෙනෙකු තුවාල ලබා තිබෙනවා. ඒ, අඟුණකොළපැලැස්ස 175 වන කිලෝමීටර් කණුව අසල දීයි. මත්තල සිට කොළඹ බලා ධාවනය වූ කුඩා වර්ගයේ වෑන් රථයක පිටුපස ටයරයක් පුරාගොස්, එම වැන් රථය ආරක්ෂිත වැටේ ගැටී අනතුර සිදුව ඇති බවයි පොලීසිය පැවසුවේ. අනතුරෙන් තුවාල ලැබූ වෑන් රථයේ සිටි පුද්ගලයින් 06 දෙනෙකු අඟුණකොළපැලැස්ස රෝහලට ඇතුළත් කිරීමෙන් අනතුරුව ඔවුන් වැඩිදුර ප්‍රතිකාර සඳහා හම්බන්තොට රෝහලට මාරු කර තිබෙනවා. ඒහිදී තුවාල ලබා අසාධ්‍ය තත්ත්වයේ සිටි කාන්තාවන් දෙදෙනෙකු මිය ගොස් ඇති බවයි පොලීසිය පැවසුවේ. මියගොස් ඇත්තේ 72 හැවිරිදි සහ 44 හැවිරිදි වයස්වල පසුවූ වැලිගම ප්‍රදේශයේ කාන්තාවන් දෙදෙනෙක්. සිද්ධිය සම්බන්ධයෙන් අඟුණකොළපැලැස්ස පොලීසිය මගින් වැඩිදුර විමර්ශන ක්‍රියාත්මකයි.