පාස්කු ඉරුදින එල්ල කෙරුනු ත්රස්ත ප්රහාර සිද්ධිය සම්බන්ධයෙන් සිදු කරන විමර්ශනවලට අදාළව අපරාධ පරීක්ෂණ දෙපාර්තමේන්තුව විසින් තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා යුද හමුදා බුද්ධි අංශයේ සාමාජිකයකු වශයෙන් කටයුතු කළ කේ.එස්. මද්දුමගේ මහතා විසින් ඉදිරිපත් කර තිබෙන පෙත්සමට අදාළ විරෝධතා ගොනු කර තිබෙන බව නීතිපතිවරයා අද අභියාචනාධිකරණයට දැනුම් දුන්නා.
මෙම පෙත්සම අද අභියාචනාදීකරණයේ සභාපති විනිසුරු රොහාන්ත අබේසූරිය සහ ප්රියන්ත ප්රනාන්දු යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබුවා.
එහිදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල් සුහර්ෂී හේරත් මහත්මිය අධිකරණය හමුවේ කරුණු දක්වමින් මෙම නඩුකරයට අදාළ වග උත්තරකරුවන්ගේ විරෝධතා අධිකරණය හමුවේ ගොනුකර තිබෙන බව දැනුම් දුන්නා.
ඉන් අනතුරුව පෙත්සම්කාර පාර්ශවය වෙනුවෙන් පෙනී සිටි නීතිඥ අලි ශබ්රි මහතා අධිකරණය හමුවේ කරුණු දක්වමින් මෙම නඩුකරයට අදාළ කරුණු තහවුරු කිරීම සඳහා කෙටි දිනයක් ලබා දෙන ලෙස ඉල්ලා සිටියා.
ඒ අනුව අදාල පෙත්සම කරුණු තහවුරු කිරීම සඳහා නොවැම්බර් මස 21 වන දා කැඳවන ලෙස නියෝග කෙරුණා.
පෙත්සම්කරු කියා සිටින්නේ පාස්කු ඉරුදින එල්ල කෙරුනු ත්රස්ත ප්රහාර සිද්ධිය පිළිබඳව අපරාධ පරීක්ෂණ දෙපාර්තමේන්තුව විසින් වර්තමානයේ සිදුකරන විමර්ශනවලට අදාළව තමන්ව අත්අඩංගුවට ගැනීමේ අවධානමක් පවතින බවයි.
ඒ අනුව කිසිදු සාධාරණ පදනමක් නොමැතිව අනීතික ලෙස තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙසත් පෙත්සම්කරු අධිකරණයෙන් ඉල්ලා තිබෙනවා.
