බංග්ලාදේශය හමුවේ බිඳ වැටුණු සිය ගෞරවය අවසන් මොහොතේ රැක ගැනීමට පකිස්ථාන ක්‍රිකට් කණ්ඩායම ඊයේ රාත්‍රියේ සමත් වුණා. ඒ, දෙරට අතර පැවති අවසන් පන්දුවාර විස්සයි විස්ස ක්‍රිකට් තරඟය ලකුණු 74කින් ජය ගනිමින්. මෙම තරඟයේ පළමුවෙන් පන්දුවට පහර දුන් පකිස්ථානය නියමිත පන්දුවාර විස්ස අවසානයේ කඩුලු 07කට ලකුණු 178ක් රැස් කළා. බංග්ලාදේශ කණ්ඩායමට රැස් කර ගැනීමට හැකිවූයේ ලකුණු 104ක් පමණයි. බංග්ලාදේශයේ සත්කාරකත්වයෙන් පැවති මෙම තරඟාවලියේ පළමු තරඟ දෙකම ජය ගත්තේ බංග්ලාදේශයයි. ඒ අනුව තරඟාවලියේ ජය බංග්ලාදේශයට හිමි වුණා. ඔවුන් මෙම තරඟාවලි ජයග්‍රහණය වාර්තා කළේ ශ්‍රී ලංකාවට එරෙහි පන්දුවාර විස්සයි විස්ස ක්‍රිකට් තරඟාවලිය ජය ගැනීමෙන් අනතුරුවයි.