මත්ද්‍රව්‍ය තොගයක්, කටුනායක ගුවන් තොටුපොළ “හරිත මාවත” ඔස්සේ පිට කර ගෙන යාමට තැත් කරමින් සිටි විදේශීය ගුවන් මගියෙකු අද අලුයම අත්අඩංගුවට ගෙන තිබෙනවා. ඒ, ගුවන් තොටුපොළ රේගු මත්ද්‍රව්‍ය පාළන අංශයේ නිලධාරීන් පිරිසක් විසින්. ඔහු මෙම මත්ද්‍රව්‍ය තොගය කැනඩාවෙන් රැගෙන, කටාර් රාජ්‍යයේ දෝහා වෙත පැමිණ තිබෙනවා. පසුව එතැන් සිට කටාර් ගුවන් සේවයේ ගුවන් යානයකින් කටුනායක ගුවන් තොටුපොළ වෙත පැමිණ තිබුණා. ඔහු විසින් රැගෙන ආ ගමන් මල්ල තුළ “හෂීෂ්”‍ මත්ද්‍රව්‍ය කිලෝ ග්‍රෑම් 12යි ග්‍රෑම් 196ක් සහ “කොකේන්”‍ කිලෝ ග්‍රෑම් 05යි ග්‍රෑම් 298ක් සොයා ගත් බවයි රේගු මත්ද්‍රව්‍ය පාලන අංශයේ නිලධාරීන් පැවසුවේ. එලෙස අත්අඩංගුවට ගත් මත්ද්‍රව්‍යවල වටිනාකම රුපියල් කෝටි හතළිහක් පමණ වන බවටයි අනාවරණ වී ඇත්තේ. අත්අඩංගුවට ගත් සැකකරු 52 හැවිරිදි කැනඩාවේ ඔන්ටාරියෝ හි පදිංචිකරුවෙක්.