මෙරට ආර්ථිකයේ ධනාත්මක තත්ත්වයන් වාර්තා වීම සෑම පුරවැසියෙකු තුළම ඇති කරන්නේ සතුටක්. ඒ, ආර්ථික අර්බුදය හේතුවෙන් පසුගිය කාල වකවානුවේ මෙරට ජීවත් වන සෑම පුද්ගලයෙකුම මුහුණ දුන් තත්ත්වයන් පිළිබඳ ඔවුන් සෑම කෙනෙකු තුළම ඇති අවබෝධය නිසායි. මේ, මෙම වසරේ මුල් මාස 05 තුළ රාජ්‍ය ආදායමේ වර්ධනය සම්බන්ධයෙන් විමසා බැලීමක්.

  මෙම වසරේ ජනවාරි සිට මැයි දක්වා මාස 05ක කාලපරිච්ඡේදය තුළ රුපියල් බිලියන 1,942.36ක රාජ්‍ය ආදායමක් වාර්තා වී ඇති බව ශ්‍රී ලංකා මහ බැංකුව පසුගිය දා ප්‍රකාශ කළා. මෙය 2024 වසරේ මුල් මාස 05 දී ලැබූ රාජ්‍ය ආදායම් අගය වූ රුපියල් බිලියන 1,619.23 හා සැසඳීමේදී 19.95%ක වර්ධනයක්. රජයේ බදු ආදායම මෙම වකවානුව තුළ දී රුපියල් බිලියන 1,491.25 සිට රුපියල් බිලියන 1,802.48ක් දක්වා සියයට 20.8 7කින් ඉහළ යාම මීට ප්‍රධාන වශයෙන් බලපා තිබෙනවා. රාජ්‍ය ආදායම ඉහළ යාම තුළින් අයවැය හිඟය අවමකර ගැනීමට හැකි වීම මෙරට ආර්ථිකයේ සුබ ලකුණක් වනවා. ඒ තුළින් ආර්ථිකයට තවත් බොහෝ ධනාත්මක කරුණු හිමිවන බවයි පේරාදෙණිය විශ්වවිද්‍යාලයේ ආර්ථික විද්‍යා හා සංඛ්‍යාන අධ්‍යයන අංශයේ මහාචාර්ය වසන්ත අතුකෝරල මහතා පෙන්වා දෙන්නේ. මෙම වසරේ පළමු මාස 05 තුළ රාජ්‍ය වියදම වැඩි වීමට සාපේක්ෂව රාජ්‍ය ආදායම වැඩි වීම ඉහළ මට්ටමක පැවතීම ද ආර්ථිකයට හිතකර ලක්ෂණයක් වනවා. කෙසේවෙතත් මෙම තත්ත්වය ජනතාවට සෘජුව දැනෙන භාණ්ඩ මිල අඩු වීමට හේතුවක් වන්නේ නැහැ.