රක්‍ෂිත බන්ධනාගාරගත කළ හිටපු පාර්ලිමේන්තු මන්ත්‍රී පූජ්‍ය අතුරලියේ රතන හිමියන් සහ හිටපු අමාත්‍ය රාජිත සේනාරත්න මහතා මේ වන විට බන්ධනාගාර දෙකක රඳවා සිටිනවා. ඒ අනුව පූජ්‍ය අතුරලියේ රතන හිමියන් කොළඹ මැගසින් බන්ධනාගාරයේ ජී වාට්ටුවේ රැඳවූ බවයි බන්ධනාගාර දෙපාර්තමේන්තුව පැවසුවේ. එම වාට්ටුවේ තවත් රැඳවියන් 50 දෙනෙකු පමණ රඳවා සිටිනවා. පූජ්‍ය අතුරලියේ රතන හිමියන්ගේ ආරක්‍ෂාව පිළිබඳ සැලකිල්ලට ගනිමින් එම වාට්ටුවේ වෙනම සිර මැදිරියක උන්වහන්සේ රඳවා තිබෙනවා. ඒ, තවත් රැඳවියන් කිහිපදෙනෙකු සමගයි. ඒ අනුව උන්වහන්සේ ඇතුළු එම සිර මැදිරියේ රඳවා සිටින සෙසු රැඳවියන් කිහිපදෙනා ජී වාට්ටුවේ රඳවා සිටින සෙසු රැඳවියන් සමග නොගැටෙන බවයි බන්ධනාගාර ආරංචි පැවසුවේ. පූජ්‍ය අතුරලියේ රතන හිමියන් සැප්තැම්බර් මස 12 වනදා දක්වා රක්ෂිත බන්ධනාගාර ගත කෙරුණා. ඒ, උන්වහන්සේ ඊයේ දිනයේ ගංගොඩවිල මහේස්ත්‍රාත් අධිකරණය හමුවේ පෙනී සිටි අවස්ථාවේදීයි. අපේ ජනබල පක්ෂයේ මහ ලේකම් පූජ්‍ය වේදිනිගම විමලතිස්ස හිමියන් පැහැරගෙන ගොස් උන්වහන්සේ බිය ගන්වා 2020 වසරේදී එම පක්ෂයට ලද ජාතික ලැයිස්තු මන්ත්‍රී ධූරය ලබා ගැනීම සම්බන්ධයෙන් එල්ලවන චෝදනාවකට අදාලව පූජ්‍ය අතුරලියේ රතන හිමියන් එලෙස රක්‍ෂිත බන්ධනගාරගත කර තිබෙනවා. මේ අතර, රක්‍ෂිත බන්ධනාගාරගත කළ හිටපු අමාත්‍ය රාජිත සේනාරත්න මහතා කොළඹ රිමාන්ඩ් බන්ධනාගාරයේ රඳවා සිටිනවා. ඊයේ පස්වරු 05ට පමණ එම බන්ධනාගාරයට රැගෙන ආ හිටපු අමාත්‍යවරයා එන් වාට්ටුවේ රැඳවූ බවයි බන්ධනාගාර ආරංචි පැවසුවේ. ඔහු සමග එම බන්ධනාගාරයේ තවත් රැඳවියන් 14 දෙනෙකු පමණ රඳවා සිටිනවා. එම රැඳවියන් සියලු දෙනා විවිධ චෝදනා යටතේ රක්‍ෂිත බන්ධනාගාරගත කළ රාජ්‍ය සේවකයන් වනවා. ඒ අතර ආගමන විගමන දෙපාර්තමේන්තුවේ හිටපු පාලක ජනරාල් හර්ෂ ඉලුක්පිටියද සිටින බවයි බන්ධනාගාර ආරංචි පැවසුවේ. ඊට අමතරව රක්‍ෂිත බන්ධනාගාරගත පොලිස් නිලධාරීන් කිහිපදෙනෙකුද එන් වාට්ටුවේ රඳවා සිටිනවා. ඊයේ පස්වරුවේ කොළඹ රිමාන්ඩ් බන්ධනාගාරය වෙත රැගෙන ආ හිටපු අමාත්‍ය රාජිත සේනාරත්න මහතා බන්ධනාගාර වෛද්‍යවරයෙකු විසින් පරික්‍ෂා කර තිබෙනවා. එහිදී අනාවරණ වී ඇත්තේ ඒ වනවිට හිටපු අමාත්‍යවරයා යහපත් සෞඛ්‍ය තත්ත්වයෙන් පසුවන බවයි බන්ධනාගාර ආරංචි පැවසුවේ. ඒ අනුව හිටපු අමාත්‍ය රාජිත සේනාරත්න මහතා කොළඹ රිමාන්ඩ් බන්ධනාගාරයේ එන් වාට්ටුවේ රඳවා තිබෙනවා. අත්අඩංගුවට ගැනීම සඳහා වරෙන්තු නිකුත් කර තිබූ හිටපු අමාත්‍ය රාජිත සේනරත්න මහතා, බන්ධනාකාර නිලධාරීන් විසින් ඊයේ දිනයේකොළඹ මහේස්ත්‍රාත් අධිකරණයට ඉදිරිපත් කිරීමෙන් පසුව ලබන 09 වනදා දක්වා රක්ෂිත බන්ධනාගාරගත කෙරුණා. එමෙන්ම ප්‍රකාශයක් සටහන් කර ගැනීම සඳහා සැකකාර රාජිත සේනාරත්න මහතා ලබන 03 වනදා පෙරවරු 09ට අල්ලස් කොමිසම හමුවට ඉදිරිපත් කිරීමට පියවර ගන්නා ලෙසයි කොළඹ ප්‍රධාන මහේස්ත්‍රාත් අසංක. එස්. බෝදරගම මහතා බන්ධනාගාර නිලධාරීන්ට නියම කළේ. කොළඹ මහාධිකරණයේ නියෝග මත රිමාන්ඩ් භාරයට ගන්නා ලද සැකකාර රාජිත සේනාරත්න මහතාව මෙම නඩුකරය කොළඹ මහේස්ත්‍රාත් අධිකරණය හමුවේ ඊයේ කැඳවූ අවස්ථාවේදී බන්ධනාගාර නිලධාරීන් විසින් අධිකරණය හමුවට ඉදිරිපත් කර තිබුණා. එහිදී අල්ලස් කොමිසම වෙනුවෙන් පෙනී සිටි එහි සහකාර අධ්‍යක්ෂ ජනරාල් සුලෝචනා හෙට්ටිආරච්චි මහත්මිය අධිකරණය හමුවේ කරුණු දක්වමින් පැවසුවේ මෙම සැකකරු ධීවර අමාත්‍යවරයා වශයෙන් කටයුතු කළ අවදියේ 2013 වසරේ ලැබුණු නිර්ණාමික පැමිණිල්ලකට අනුව මෙම විමර්ශනය ආරම්භ කළ බවයි. කිරින්ද ධීවර වරායේ වැලි ඉවත් කර ඒවා පිරිසිදු කර වෙළඳපොළට නිකුත් කිරීමේ ව්‍යාපෘතියක් කොරියානු” සී වූ” සමාගම වෙත පැවරීමට මෙම සැකකරු කටයුතු කර තිබූ බව එම පැමිණිල්ලේ සඳහන් කර තිබු බව සහකාර අධ්‍යක්ෂ ජෙනරාල්වරිය පැවසුවා. මේ අතර යළි රක්‍ෂිත බන්ධනාගාරගත කළ හිටපු රාජ්‍ය අමාත්‍ය ශෂීන්ද්‍ර රාජපක්ෂ මහතාද කොළඹ රිමාන්ඩ් බන්ධනාගාරයේ ‘එම් ටූ’ වාට්ටුවේ රඳවා සිටිනවා. ඒ තවත් රැඳවියන් 10 දෙනෙකුද සමගින්. මත්ද්‍රව්‍ය ජාවාරම්කරුවන් ඇතුළු විවිධ චෝදනා යටතේ රක්‍ෂිත බන්ධනාගාරගත කළ රැඳවියන් පිරිසක් සමග එලෙස හිටපු රාජ්‍ය අමාත්‍ය ශෂීන්ද්‍ර රාජපක්ෂ මහතා රඳවා සිටින බවයි බන්ධනාගාර ආරංචි වැඩිදුරටත් පැවසුවේ.