තමන්ට නිවසින් රැගෙන එන ආහාර ලබා ගැනීමට අවසර දෙන්නැයි ඉල්ලා රක්‍ෂිත බන්ධනාගාරගත කළ හිටපු අමාත්‍ය රාජිත සේනාරත්න මහතා බන්ධනාගාරයෙන් ඉල්ලීමක් කර තිබෙනවා. ඊයේ පස්වරුවේ ඔහු කොළඹ රිමාන්ඩ් බන්ධනාගාරයට රැගෙන ඒමෙන් අනතුරුව එම ඉල්ලීම කර ඇති බවයි බන්ධනාගාර ආරංචි පැවසුවේ. එම බන්ධනාගාරය වෙත ඔහු රැගෙන ඒමෙන් පසු බන්ධනාගාර වෛද්‍යවරයෙකු විසින් පරික්‍ෂා කර තිබෙනවා. එහිදී අනාවරණ වී ඇත්තේ ඔහු රෝහල්ගත කිරීමට තරම් රෝගී තත්ත්වයක් නොමැති බවයි. ඒ අනුව හිටපු අමාත්‍යවරයා කොළඹ රිමාන්ඩ් බන්ධනාගාරයේ ‘එන්’ වාට්ටුවේ රඳවා තිබෙනවා. ඔහු සමග එම වාට්ටුවේ තවත් රැඳවියන් 14 දෙනෙකු පමණ රඳවා සිටින බවයි බන්ධනාගාර ආරංචි පැවසුවේ. මේ අතර යළි රක්‍ෂිත බන්ධනාගාරගත කළ හිටපු රාජ්‍ය අමාත්‍ය ශෂීන්ද්‍ර රාජපක්ෂ මහතාද රඳවා සිටින්නේ කොළඹ රිමාන්ඩ් බන්ධනාගාරයේයි. ‘එම් ටූ’ වාට්ටුවේ තවත් රැඳවියන් 10 දෙනෙකුද සමග ඔහු රඳවා සිටින බවයි බන්ධනාගාර ආරංචි පැවසුවේ. රක්‍ෂිත බන්ධනාගාරගත කළ හිටපු පාර්ලිමේන්තු මන්ත්‍රී පූජ්‍ය අතුරලියේ රතන හිමියන් කොළඹ මැගසින් බන්ධනාගාරයේ ජී වාට්ටුවේ රඳවා සිටිනවා. එම වාට්ටුවේ තවත් රැඳවියන් 50 දෙනෙකු පමණ රඳවා සිටින බවයි බන්ධනාගාර ආරංචි පැවසුවේ. පූජ්‍ය අතුරලියේ රතන හිමියන්ගේ ආරක්‍ෂාව පිළිබඳ සැලකිල්ලට ගනිමින් තවත් රැඳවියන් කිහිපදෙනෙකු සමග එම වාට්ටුවේ වෙනම සිර මැදිරියක රඳවා තිබෙනවා.
Published
