Published
කොළඹ ජාතික රෝහලේ දැඩි සත්කාර ඒකකයේ ප්‍රතිකාර ලබමින් සිටි හිටපු ජනාධිපති රනිල් වික්‍රමසිංහ මහතා රෝහලෙන් පිටව ගොස් තිබෙනවා. ඒ, අද උදෑසන රනිල් වික්‍රමසිංහ මහතා සාමාන්‍ය වාට්ටුවක් වෙත මාරු කර යැවීමෙන් පසුවයි. රෝහලෙන් බැහැරව ගියද දී ඇති වෛද්‍ය උපදෙස් අනුව හිටපු ජනාධිපතිවරයා සිය නිවසේ තවදුරටත් විවේකයෙන් ගත කිරීමට නියමිතය බවයි එක්සත් ජාතික පක්ෂ මාධ්‍ය ඒකකය පැවසුවේ. නිවසේ රැඳි සිටින කාලය තුළදී රනිල් වික්‍රමසිංහ මහතාගේ සෞඛ්‍ය තත්ත්වය සම්බන්ධයෙන් පවුලේ වෛද්‍යවරුන් දැඩි අධීක්ෂණයෙන් කටයුතු කරනු ලබන බවද එම නිවේදනයේ වැඩිදුරටත් සඳහන්. හිටපු ජනාධිපති රනිල් වික්‍රමසිංහ මහතාගේ සෞඛ්‍ය තත්ත්වය සම්බන්ධයෙන් එක්සත් ජාතික පක්ෂයේ සභාපති වජිර අබේවර්ධන මහතාගෙන් මාධ්‍යවේදීන් විමසා සිටියා.
පාර්ලිමේන්තු මන්ත්‍රී ආචාර්ය හර්ෂ ද සිල්වා මහතාද මාධ්‍ය වෙත අදහස් පළ කළා. රනිල් වික්‍රමසිංහ මහතාගේ සෞඛ්‍ය තත්ත්වය සම්බන්ධයෙන් සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි මහතාගෙන්ද මාධ්‍යවේදීන් විමසා සිටියා. ඉකුත් සිකුරාදා අධිකරණයට ඉදිරිපත් කර රක්‍ෂිත බන්ධනාගාරගත කළ හිටපු ජනාධිපති රනිල් වික්‍රමසිංහ මහතා පසුව කොළඹ ජාතික රෝහලේ දැඩි සත්කාර ඒකකයට ඇතුළත් කෙරුණා. ඔහුට එරෙහිව නීති කෘත්‍ය කැඳවූ ඉකුත් අඟහරුවාදා දිනයේද රනිල් වික්‍රමසිංහ මහතා රැඳී සිටියේ දැඩි සත්කාර ඒකකයේයි. ඔහු අද දිනයේ සාමාන්‍ය වාට්ටුවකට මාරු කර තිබුණා.
