මාස 7කින් පියාව දැක නෑ: ඉම්රාන් ඛාන්ගේ පුතුන්ගෙන් පාකිස්තාන රජයට බරපතල චෝදනා
පාකිස්තානයේ හිටපු අග්රාමාත්ය ඉම්රාන් ඛාන් සිරගත කර වසර තුනක් පිරෙන මොහොතේ, ඔහුගේ සෞඛ්ය තත්ත්වය සහ ජීවිත ආරක්ෂාව පිළිබඳව පවුලේ සමීපතමයන් අතර දැඩි නොසන්සුන්තාවයක් හටගෙන තිබේ.
පාකිස්තාන රජය විසින් තම පියා හමුවීමට ඇති ඉඩකඩ සම්පූර්ණයෙන්ම අහුරා ඇති බවට ඔහුගේ පුතුන් දෙදෙනා චෝදනා කරති.
ඉම්රාන් ඛාන්ගේ පුතුන් වන කාසිම් සහ සුලෙයිමාන් ඊසා ඛාන් පෙන්වා දෙන්නේ පසුගිය මාස හතක කාලය තිස්සේ සිය පියා හමුවීමට පවුලේ කිසිදු සාමාජිකයෙකුට, වෛද්යවරයෙකුට හෝ නීතිඥයෙකුට අවස්ථාව ලබා දී නොමැති බවයි. එම නිසා ඔහුගේ වර්තමාන සෞඛ්ය තත්ත්වය සම්බන්ධයෙන් කිසිදු තොරතුරක් ලබා ගැනීමට නොහැකි වී ඇති බව ඔවුහු පවසති.
එක්සත් රාජධානියේ (බ්රිතාන්යයේ) සිටින තමන්, සිය පියා සිරගත කිරීමට එරෙහිව මාධ්ය හමුවේ අදහස් දක්වන සෑම අවස්ථාවකම, පාකිස්තාන බලධාරීන් තමන්ට පියා හමුවීමට ඇති ඉඩකඩ තවත් අහුරන බව ඉම්රාන් ඛාන්ගේ පුතුන් චෝදනා කරයි. ඔවුහු පවසන්නේ වීසා ප්රමාද කිරීම සහ අනවශ්ය පරිපාලන බාධා ඇති කිරීම මගින් තමන්ට පාකිස්තානයට පැමිණීමට ඇති මඟ අහුරන බවයි.
"අපි පාකිස්තානයට යන්න ගොඩක් උත්සාහ කරනවා, නමුත් කිසිම යහපත් ප්රතිචාරයක් ලැබෙන්නේ නැහැ," යනුවෙන් කාසිම් ඛාන් පැවසීය. "අපිට වීසා ලබා නොදීමට කිසිම සාධාරණ හේතුවක් නැහැ."
කෙසේ වෙතත්, මෙම චෝදනා සම්බන්ධයෙන් CNN පුවත් සේවයට අදහස් දක්වමින් පාකිස්තාන තොරතුරු අමාත්යාංශය සඳහන් කළේ, කාසිම් සහ සුලෙයිමාන් යන දෙදෙනාම විදේශගත පාකිස්තානුවන් සඳහා වන ජාතික හැඳුනුම්පත් (NICOP) හිමිකරුවන් බවයි. එම ලේඛනය සතුව පවතින බැවින් ඔවුන්ට පාකිස්තානයට ඇතුළු වීමට වෙනම වීසා අවශ්ය නොවන බව පවසන අමාත්යාංශය, ඔවුන්ගේ මෙම චෝදනා නොමග යවන සුලු එකක් බවත්, සාමාන්ය පරිපාලන ක්රියාවලියක් දේශපාලන වාසි ලබාගැනීමේ මාතෘකාවක් බවට පත්කිරීමට ඔවුන් උත්සාහ කරන බවත් ප්රකාශ කළේය.
එහෙත්, සිය ජාතික හැඳුනුම්පත්වල කල් ඉකුත් වී ඇති අතර ඒවා මෙතෙක් යාවත්කාලීන කර නොමැති බව ඉම්රාන් ඛාන්ගේ පුතුන් දෙදෙනා පෙන්වා දෙයි. කෙසේ වෙතත්, එම තාක්ෂණික ගැටලුව සම්බන්ධයෙන් පාකිස්තාන තොරතුරු අමාත්යාංශය මෙතෙක් කිසිදු ප්රකාශයක් සිදුකර නොමැත.
