ඕස්ටේ්‍රලියාවේ සිඩ්නිහි බොන්ඩි වෙරළ තීරයේ සිදු වූ වෙඩි තැබීමෙන් මිය ගිය පුද්ගලයින්ගේ අවසන් කටයුතු සඳහා විශාල ජන සහභාගිත්වයකින් යුතුව පවත්වමින් තිබෙනවා.

මේ සඳහා එරට අග්‍රාමාත්‍යවරයා ප්‍රමුඛ දේශපාලඥයින් රැසක්ද එක්ව සිටින බවයි විදෙස් මාධ්‍ය වාර්තා කළේ.

ඕස්ටේ්‍රලියාව සහ එංගලන්තය අතර පැවැත්වෙන අළු බඳුන ක්‍රිකට් තරඟාවලියේ තුන්වන තරඟය අද ආරම්භ කිරීමට පෙර මෙම ප්‍රහාරයෙන් ජීවිතක්‍ෂයට පත් වූවන් වෙනුවෙන් විනාඩියක නිශ්ශබ්දතාවක්ද පැවැත්වුවා.

ඕස්ටේ්‍රලියාවේ සිඩ්නිහි බොන්ඩි වෙරළ තීරයේ සිදු වූ වෙඩි තැබීමෙන් පුද්ගලයින් 15 දෙනෙකු ජීවිතක්‍ෂයට පත් වුණා. තුවාල ලැබූ 22ක් තවදුරටත් රෝහල්ගතව ප්‍රතිකාර ලබනවා.

ඒ අතරින් 09 දෙනෙකුගේ තත්ත්වය බරපතලයි.

තුවාල ලැබූවන්ට රුධිරය පරිත්‍යාග කිරීම සඳහා 50,000කට අධික පිරිසක් එක්ව ඇති බවද විදෙස් මාධ්‍ය වාර්තා කළා.

වෙරළ තීරයේ රැදී සිටි පිරිස් ඉලක්ක කරගනිමින් තුවක්කරුවන් දෙදෙනෙකු විසින් මෙම වෙඩි තැබීම සිදුකර තිබුණා.

ඒ, පුද්ගලයින් 1,000ක පමණ පිරිසකගේ සහභාගීත්වයෙන් සිඩ්නිහි, ප්‍රකට බොන්ඩි වෙරළ තීරයේ පැවැත්වීමට නියමිතව තිබූ යුදෙව් ප්‍රජාවගේ ආගමික උත්සවයක් ඉලක්ක කරගෙනයි.

වෙඩි තැබූ එක් පුද්ගලයෙකු ඉන්දීය සම්භවයක් ඇති අයෙකු බවටයි දැන් තහවුරු කරගෙන ඇත්තේ.

ඔහු 1998 වසරේදී ඕස්ටේ්‍රලියාවට පැමිණ ඇත්තේ දකුණු ඉන්දියාවේ සිටයි.