ගෙවුම් ශේෂය ඉහළ නැංවීම සඳහා ක්රියාත්මක කළ නියාමන ක්රියාමාර්ග හේතුවෙන් අඛණ්ඩව විදේශ විනිමය ගලා ඒම මත, ඉන්දියාවේ විදේශ විනිමය සංචිත ප්රමාණය අගෝස්තු 21 වනදායින් අවසන් වූ සතිය තුළ ඩොලර් බිලියන 729.33 ක ඓතිහාසික ඉහළම අගය දක්වා ඉහළ ගොස් ඇති බව ඉන්දියානු මහ බැංකුවේ නවතම දත්ත පෙන්වා දෙයි.
මෙලෙස ඉන්දියාවේ විදේශ විනිමය සංචිතය අඛණ්ඩව සති අටක් පුරා වර්ධනය වී ඇති අතර, එම කාලය තුළ පමණක් සංචිතයට ඩොලර් බිලියන 63 කට ආසන්න මුදලක් එකතු වී තිබේ. මෙය මීට පෙර පෙබරවාරි මාසයේදී වාර්තා වූ උපරිම සංචිත මට්ටම ද අභිබවා යාමකි.
විදේශීය ඩොලර් ගලා ඒම උත්තේජනය කිරීම සඳහා ඉන්දියාව ඉකුත් ජූනි මාසයේදී විශේෂ වැඩපිළිවෙළක් හඳුන්වා දුන්නේය. රාජ්ය සමාගම් සහ බැංකු මගින් සිදුකරන විදේශීය ණය ලබාගැනීම් සඳහා සහනදායී ආරක්ෂණ පහසුකම් සැලසීම සහ බැංකු සඳහා විදේශීය විනිමය තැන්පතු රැස් කිරීමට පිරිවැයකින් තොර ආරක්ෂණ පහසුකම් ලබාදීම ඊට ඇතුළත් විය.
මෙම ක්රමවේදය යටතේ ජූනි 5 සිට අගෝස්තු 21 දක්වා කාලය තුළ ඉන්දියානු මහ බැංකුව වෙත ඩොලර් බිලියන 73 කට ආසන්න මුදලක් ලැබී ඇති අතර, ඉන් ඩොලර් බිලියන 65 ක්ම වාර්තා වී ඇත්තේ විදේශගත ඉන්දියානුවන්ගේ තැන්පතු මගිනි.
අපේක්ෂිත ප්රමාණයටත් වඩා විශාල ලෙස විදේශ විනිමය ගලා ඒම හේතුවෙන්, තැන්පතු සඳහා ලබාදී තිබූ ආරක්ෂණ පහසුකම නියමිත කාලයට මසකට පෙර, එනම් අගෝස්තු අග වන විට අවසන් කිරීමට මහ බැංකුව පියවර ගත්තේය.
