වතිකානය විසින් නිකුත් කරන ලද නවතම වෛද්‍ය වාර්තාවකට අනුව, 14 වන ලියෝ පාප්වහන්සේගේ පෙනහැල්ලේ හඳුනාගත් පිළිකාමය ගෙඩියක් ඉවත් කිරීම සඳහා සිදුකළ සංකීර්ණ ශල්‍යකර්මය සම්පූර්ණ සාර්ථකත්වයෙන් අවසන් වී තිබෙනවා.
71 හැවිරිදි වියෙහි පසුවන පාප්වහන්සේ, රෝමයේ ප්‍රකට ජෙමෙලි රෝහලේදී විනාඩි 90 ක කාලයක් පුරා එම ශල්‍යකර්මයට මුහුණදුන් අතර, එහිදී උන්වහන්සේගේ දකුණු පෙනහැල්ලේ පහළ කොටස සම්පූර්ණයෙන්ම ඉවත් කර ඇත්තේ පිළිකා සෛල සම්පූර්ණයෙන් ඉවත් කිරීමේ අරමුණින්.
සාමාන්‍ය වෛද්‍ය පරීක්ෂාවකදී පාප්වහන්සේගේ පෙනහැල්ලේ තිබී මෙම ගැටිත්ත මුල් අවධියේදීම හඳුනාගැනීමට වෛද්‍යවරුන්ට හැකි වී තිබූ අතර, ශල්‍යකර්මයෙන් පසු එය පල්මොනරි ඇඩිනොකාර්සිනෝමා නැමැති පිළිකා තත්ත්වයක් බව වැඩිදුර පරීක්ෂණවලදී තහවුරු වී තිබෙනවා.
ශල්‍යකර්මයෙන් පසු කිසිදු සංකූලතාවකින් තොරව සාමාන්‍ය තත්ත්වයට පත්ව ඇති පාප්වහන්සේ, මේ වන විට රෝහල් කාමරය වෙත පැමිණ විවේකීව පසුවන බවයි වතිකානය සඳහන් කළේ.
රෝහල්ගතව සිටියදී උන්වහන්සේ දැක බලා ගැනීම සඳහා රෝහල වෙත රැස්ව සිටි බැතිමතුන්ට පාප්වහන්සේ සිනහවෙන් යුතුව අතවනමින් සිය කෘතඥතාව පළ කර තිබුණා.
පූර්ණ සුවය ලබා ගැනීම සඳහා උන්වහන්සේ තවත් සතියක පමණ කාලයක් රෝහල්ගතව පසුවනු ඇති අතර, ඒ හේතුවෙන් එළඹෙන ඔක්තෝබර් 20 වනදා දක්වා උන්වහන්සේගේ සියලුම නිල කාලසටහන් සහ රාජකාරි කටයුතු තාවකාලිකව අත්හිටුවීමට වතිකානය පියවර ගෙන තිබෙනවා.
පිළිකාව සිරුරේ වෙනත් ප්‍රදේශවලට පැතිරී ඇද්ද යන්න තහවුරු කර ගැනීම සඳහා අතිරේක වෛද්‍ය පරීක්ෂණ කිහිපයක් ද මේ වන විට ක්‍රියාත්මක බවයි වාර්තා වුණේ.
