ලබන වසරේදී බලාත්මක වීමට නියමිත සන්ධිස්ථානීය නිදහස් වෙළඳ ගිවිසුමට අමතරව, දෙපාර්ශ්වය අතර ද්විපාර්ශ්වික සබඳතා තවදුරටත් පුළුල් කරමින් යුරෝපා සංගමයේ ප්රධානතම ‘හොරයිසන්’ පර්යේෂණ වැඩසටහනට ඉන්දියාවේ සහභාගීත්වය ලබා ගැනීම සඳහා වන නිල සාකච්ඡා ආරම්භ කිරීමට යුරෝපා සංගමය සහ ඉන්දියාව එකඟතාවකට පැමිණ තිබේ.
බදාදා නිකුත් කරන ලද ඒකාබද්ධ ප්රකාශයකට අනුව, යුරෝ බිලියන 95.5ක් වටිනා 'හොරයිසන් යුරෝප්'පර්යේෂණ හා නවෝත්පාදන වැඩසටහන සමඟ ඉන්දියාව එක් කරගැනීම පිළිබඳ සාකච්ඡා මේ වසර අවසන් වීමට පෙර නිමා කිරීම දෙපාර්ශ්වයේම අරමුණයි.
මෙම ගිවිසුම මඟින් ඉන්දියානු විශ්වවිද්යාල, පර්යේෂණ ආයතන සහ සමාගම්වලට යුරෝපීය හවුල්කරුවන් සමඟ එක්ව ඒකාබද්ධ ව්යාපෘති සඳහා දායක වීමේ අවස්ථාව හිමි වේ.
බ්රසල්ස් නුවරදී බදාදා තෙවැනි වරට රැස්වූ යුරෝපා සංගම්-ඉන්දියා වෙළඳ හා තාක්ෂණ කවුන්සිලයේ හමුවෙන් අනතුරුව මෙම තීරණ ප්රකාශයට පත් කෙරිණි.
එහිදී එකඟ වූ ප්රධාන කරුණු මෙසේය:
විදුලි වාහන ආරෝපණ තාක්ෂණය සහ පරීක්ෂණ වෙනුවෙන් ප්රථම යුරෝපා සංගම්-ඉන්දියා නවෝත්පාදන කේන්ද්රස්ථානය පිහිටුවීම.
පරිසර හිතකාමී සහ උසස් තාක්ෂණය මුල් කරගත් ඒකාබද්ධ නව ව්යවසායකත්ව හවුල්කාරිත්වයක් ආරම්භ කිරීම.
අර්ධ සන්නායක, අධි-කාර්ය සාධන පරිගණකකරණය, ක්වොන්ටම් තාක්ෂණය, කෘතිම බුද්ධිය සහ 6G තාක්ෂණය පිළිබඳ සහයෝගීතාව ඉහළ නැංවීම.
කෘෂි ආහාර, ඖෂධ නිෂ්පාදනය සඳහා යොදාගන්නා සක්රීය ඖෂධීය සංයෝග සහ පිරිසිදු බලශක්ති තාක්ෂණයන් සඳහා වන සැපයුම් දාමයන් ශක්තිමත් කිරීම.
විද්යාත්මක සොයාගැනීම්, තාක්ෂණික සංවර්ධනය මෙන්ම දේශගුණික විපර්යාස සහ මහජන සෞඛ්ය වැනි ගෝලීය අභියෝගවලට මුහුණ දීම ‘හොරයිසන් යුරෝප්’ වැඩසටහනේ මූලික අරමුණයි.
ලෝක දේශපාලනික නොසන්සුන්තාව සහ චීනය මත පවතින ආර්ථික රඳාපැවැත්ම අවම කිරීමට ප්රධාන පෙළේ ආර්ථිකයන් ගන්නා උත්සාහයන් හමුවේ, අත්යවශ්ය ඛනිජ ද්රව්යවල සිට උසස් තාක්ෂණය දක්වා වූ ක්ෂේත්රයන්හි සැපයුම් දාමයන් විවිධාංගීකරණය කිරීමටත්, වෙනත් රටවල් මත පවතින උපායමාර්ගික රඳාපැවැත්ම අවම කිරීමටත් බ්රසල්ස් සහ නවදිල්ලිය උත්සාහ කරමින් සිටින බව මෙමඟින් මනාව පැහැදිලි වේ.
