මොණරාගල ප්‍රදේශයේ පදිංචි වයස අවුරුදු දාහතරක පාසල් සිසුවෙකුට අතවර කල බවට චෝදනා එල්ල වූ මොණරාගල ප්‍රදේශයේම පදිංචි වයස අවුරුදු 49 ක ගුරුවරියකට සිරදඩුවම් නියම කර තිබෙනවා.
ඒ, මොණරාගල මහාධිකරණය විසින්. පසුගිය 2019 වසරේ සැප්තැම්බර් මාසයේ දිනක මෙම ගුරුවරිය අදාළ සිසුවා සිය නිවසට ගෙන්වාගෙන ඔහුට අතවර කර අඹුසැමියන් ලෙස හැසිරී ඇතැයි සිදුකළ විමර්ශනවලදී අනාවරණ වී තිබෙනවා.
එවන් පසුබිමක් තුළ එල්ල වූ චෝදනා තුනකට ගුරුවරිය වරදකරු බවට මොණරාගල මහාධිකරණය තීන්දු කළා.
ඒ අනුව එක් චෝදනාවකට වසර අට බැගින් චෝදනා තුනට වසර 24ක සිරදඩුවම් නියම කර එම සිර දඬුවම වසර අටකින් ගෙවී යන ලෙසට මහාධිකරණය නියම කර තිබෙනවා.
ඊට අමතරව එක් චෝදනාවකට රුපියල් දෙලක්ෂ පනස් දහස බැගින් චෝදනා තුනට රුපියල් ලක්ෂ හත හමාරක වන්දියක් සිසුවා හට ගෙවන ලෙසටද මොණරාගල මහාධිකරණය දුන් නියෝගයේ සදහන්.
එම වන්දි මුදල නොගෙවන්නේ නම් තවත් වසරක ලිහිල් වැඩ සහිත සිරදඬුවමක් නියම කරන බවයි මහාධිකරණය නියෝග කළේ.
මේ අතර අදාළ ගුරුවරියට රුපියල් පනස් දහසක දඩයක් ද නියම කල අතර එම දඩ මුදල නොගෙවන්නේ නම් තවත් වසරක ලිහිල් වැඩ සහිත සිරදඬුවම් නියම කර තිබෙනවා.
