වහාම ක්‍රියාත්මක වන පරිදි වවුනියාව නගරාධිපතිවරයා සහ චාවකච්චේරි නගර සභාවේ උප සභාපතිවරයා ඔවුන් දැරූ ධුරවලින් ඉවත් කර තිබෙනවා.

ඒ, උතුරු පළාත් ආණ්ඩුකාරවරයා විසින්.

උතුරු පළාත් ආණ්ඩුකාර නාගලිංගම් වේදනායගම් මහතා විසින් මෙම පියවර ගෙන ඇත්තේ සිදුකළ විශේෂ විමර්ශනයකින් අනතුරුවයි.

ඔවුන් දෙදෙනා ධුරවලින් ඉවත් කිරීමට අදාළ විශේෂ ගැසට් නිවේදනයද මේ වන විට නිකුත් කර තිබෙනවා.

ආණ්ඩුකාරවරයාගේ මෙම නියෝගයත් සමග, වවුනියාව නගරාධිපති ලෙස කටයුතු කළ සුන්දරලිංගම් කන්දීපන් මහතාට ඔහුගේ නගරාධිපති ධුරය මෙන්ම සභික ධුරයද අහිමි වනවා.

එමෙන්ම, චාවකච්චේරි නගර සභාවේ උප සභාපති ලෙස කටයුතු කළ ඥානප්‍රගාසම් කිෂෝර් මහතාටද ඔහුගේ උප සභාපති ධුරය සහ සභික ධුරය අහිමි වී තිබෙනවා.