Published
රාජ්‍ය සේවාවන් ඩිජිටල්කරණය තුළින් කාර්යක්‍ෂමභාවය මෙන්ම අල්ලස හා දූෂණයද අවම කරගත හැකි බව පේරාදෙණිය විශ්වවිද්‍යාලයේ ආර්ථික විද්‍යා හා සංඛ්‍යාන විද්‍යා අධ්‍යයනාංශයේ මහචාර්ය, වසන්ත අතුකෝරළ මහතා පවසනවා. ඩිජිටල්කරණය තුළින් ගනුදෙනු කිරීමේ පිරිවැය අවම කරගත හැකි බවයි ඔහු පෙන්වා දුන්නේ.
රට දියුණු කිරීමට සෑම පද්ධතියක්ම ඩිජිටල්කරණය කිරීම අවශ්‍ය වන බවද මහාචාර්ය වසන්ත අතුකෝරළ මහතා මෙහිදී පෙන්වා දුන්නා. මේ අතර ඉකුත් අප්‍රේල් මාසයේදී නියමු ව්‍යාපෘතියක් ලෙස ක්‍රියාත්මක කළ ස්ථානීය දඩමුදල් ගෙවීමේ පහසුකම එළඹෙන සැප්තැම්බර් මාසයේ සිට රටපුරා ක්‍රියාත්මක කරන බව ශ්‍රී ලංකා තොරතුරු සහ සන්නිවේදන තාක්‍ෂණ ආයතනය ඊයේ ප්‍රකාශ කළා. එහි අධ්‍යක්‍ෂ මණ්ඩල සාමාජික හර්ෂ පුරසිංහ මහතා අද පැවති මාධ්‍ය හමුවකට එක්වෙමින් කියා සිටියේ මෙම මස අග වන විට බස්නාහිර සහ දකුණු පළාත්වල මෙම වැඩසටහන ක්‍රියාත්මක කිරීමටද අපේක්‍ෂා කරන බවයි. ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා පැවසුවේ මුදල් භාවිතයෙන් තොරව ඩිජිටල් මාධ්‍ය ඔස්සේ ගණුදෙනු කිරීම සඳහා ජනතාව හුරු කිරීම සිය වත්මන් රජයේ ප්‍රමුඛ අරමුණක් වන බවයි.
