මට්ටක්කුලිය සහ පමුණුගම ප්‍රදේශවලින් නාඳුනන පිරිමි මෘත ශරීර තුනක් සොයාගෙන තිබෙනවා. පොලීසිය පැවසුවේ අදාළ පොලිස් ස්ථානවලට ලද තොරතුරු මත ඒ සම්බන්ධයෙන් විමර්ශන ආරම්භ කර ඇති බවයි. මට්ටක්කුලිය, කාක දූපත වෙරළ තීරයේ සහ කැළණි ගඟ මෝයකට අසල තිබී නාඳුනන පිරිමි මෘත ශරීර දෙකක් හමුව තිබෙනවා. මරණකරුවන්ගේ අනන්‍යතාවය මෙතෙක් තහවුරු වී නොමැති බවයි පොලිසිය පැවසුවේ. අනෙක් පිරිමි මෘත ශරීරය පමුණුගම, එපාමුල්ල ප්‍රදේශයේ ඉදිකරමින් පවතින දෙමහල් නිවසක පිටුපස ඇති ඉඩමේ තිබී හමුව තිබෙනවා. එම පුද්ගලයා අවසන් වරට හැඳසිට ඇත්තේ කළු පැහැති සරමක් හා ලානිල් පැහැති අත්කොට කමිසයක් වන බවත් ඔහු වයස අවුරුදු 50ත් 60ත් අතර උස අඩි 05 අගල් 07ක් පමණ වන කෙට්ටු සිරුරකින් යුක්තව සිටි පුද්ගලයෙකු බවත් පොලිසිය පැවසුවා. මෘත ශරීරය හදිසි මරණ පරික්ෂණයෙන් පසු රාගම රෝහලේ මෘත ශරීරාගාරයේ තැන්පත් කර ඇති අතර පමුණුගම පොලීසිය සිද්ධිය සම්බන්ධයෙන් වැඩිදුර විමර්ශන සිදු කරනු ලබනවා.