ශ්‍රී ලංකාවේ පාකිස්ථාන මහ කොමසාරිස් මේජර් ජෙනරල් ෆහීම් උල් අසීස් මහතා සහ සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා අතර හමුවක් පවත්වා තිබෙනවා.
ඒ සෞඛ්‍ය අමාත්‍යාංශයේ දීයි
මෙහි දී ශ්‍රී ලංකාව සහ පකිස්ථානය අතර දීර්ඝකාලීන සමාජ, ආර්ථික, අධ්‍යාපන, ක්‍රීඩා සහ දේශපාලන සබඳතා පිළිබඳවත්, සෞඛ්‍ය, දේශීය වෛද්‍ය, සංචාරක හා වෛද්‍ය සංචාරක ක්ෂේත්‍රයන්ට අදාළ කටයුතු ඉදිරියේ දී තව තවත් වර්ධනය කර ගැනීම පිළිබඳව දීර්ඝ වශයෙන් සාකච්ඡා කර තිබෙනවා.
එමෙන්ම දෙරටෙහි සංස්කෘතිකාංග ඇතුළත් මාධ්‍ය වැඩසටහන් හුවමාරු කර ගැනීම සහ රුපවාහිනී ක්ෂේත්‍රයේ විචිත්‍රාංග සහ ටෙලි නාට්‍ය හුවමාරු කර ගැනීමට ඇති හැකියාව පිළිබඳව ද මෙම සාකච්ඡාවේ දී පුළුල් අවධානයක් යොමු විය.
මීට අමතරව කෘෂිකර්ම සහ තොරතුරු තාක්ෂණ ක්ෂේත්‍රයන් මෙන්ම අධ්‍යාපන ක්ෂේත්‍රය නියෝජනය වන අවස්ථා සම්බන්ධයෙන් ද සාකච්ඡා කෙරිණි.
ශ්‍රී ලංකාව සහ පකිස්ථානය අතර ශක්තිමත් සබඳතාව මෙම හමුවේදී තවදුරටත් තහවුරු කෙරුණු අතර විවිධ ක්ෂේත්‍ර ඔස්සේ එම සබඳතා වර්ධනය කරගැනීමට ඇති හැකියාව පිළිබඳව ද දෙපාර්ශ්වයේම අවධානය මෙහි දී යොමු විය.
ඉහත සියලු ක්ෂේත්‍ර තුළ පකිස්ථාන රජයේ සහාය ශ්‍රී ලංකාව‍ට නොමඳව ලබාදෙන බවට පකිස්ථාන මහ කොමසාරිස්වරයා මෙහිදී සහතික වී තිබෙනවා.
