චීනය විසින් එරට දුරස්ථ කාන්තාර ප්රදේශයක දැවැන්ත හමුදා සංකීර්ණයක් ඉදිකරමින් සිටින බව චන්ද්රිකා ඡායාරූප මඟින් අනාවරණය වී ඇතැයි විදෙස් මාධ්ය වාර්තා කරයි.
චීනය සතු දිගු දුර විහිදෙන මිසයිල රඳවා තබා ඇති න්යෂ්ටික බංකර් ආශ්රිතව පිහිටුවා ඇති බව පැවසෙන මෙම නව සංකීර්ණයට මිසයිල දියත් කිරීමේ අංගන, භූගත ආරක්ෂිත බංකර් සහ සන්නිවේදන මධ්යස්ථාන ඇතුළත් වේ.
ඇමරිකා එක්සත් ජනපදය විසින් එල්ල කළ හැකි ඕනෑම හදිසි ප්රහාරයකදී, චීනයට පෙරලා න්යෂ්ටික ප්රහාර එල්ල කිරීමේ හැකියාව තහවුරු කරගැනීම අරමුණු කරගනිමින් මෙම යටිතල පහසුකම් ඉදිකරන බව විශ්වාස කෙරේ.
තායිවාන අර්බුදය මුල් කරගනිමින් වොෂින්ටනය සහ බීජිං පාලනය අතර පවතින නොසන්සුන්කාරී වාතාවරණය හමුවේ, වර්ග කිලෝමීටර දහස් ගණනක වපසරියක් පුරා පැතිර ඇති මෙම ඉදිකිරීම් මඟින් චීනය සිය න්යෂ්ටික මර්දන උපායමාර්ගය ඉහළ නංවා ඇති බව මැනවින් පැහැදිලි වේ.
කෙසේ වෙතත්, චීන ආරක්ෂක අමාත්යාංශය තම න්යෂ්ටික වැඩපිළිවෙළ හෝ මෙම චන්ද්රිකා ඡායාරූපවලින් හෙළි වූ තොරතුරු සම්බන්ධයෙන් මෙතෙක් කිසිදු අදහසක් පළ කර නොමැත.
මේ අතර, බුද්ධි තොරතුරු සම්බන්ධ කරුණු පදනම් කරගනිමින් අදහස් දැක්වීම ඇමරිකානු ආරක්ෂක මූලස්ථානය වන පෙන්ටගනය ද ප්රතික්ෂේප කර තිබේ.
ආරක්ෂක විශ්ලේෂකයින් පවසන්නේ මෙම යටිතල පහසුකම් මඟින් චීනයේ න්යෂ්ටික වැඩසටහනට සහ අනෙකුත් මිලිටරි අරමුණුවලට විශාල සහයෝගයක් ලැබෙනු ඇති බවයි.
එහෙත් මෙහි පවතින සුවිශේෂී ව්යුහයන් තුළ චීනය කුමන ආකාරයේ ආයුධ ස්ථානගත කරනු ඇත්ද යන්නත්, එහි ට්රක් රථ මඟින් ප්රවාහනය කළ හැකි බැලස්ටික් මිසයිල රඳවන්නේද නැතහොත් න්යෂ්ටික යුධ හිස් සවිකිරීමේ පහසුකම් ස්ථාපිත කරන්නේද යන්න ඇතුළු ප්රධාන කරුණු රැසක් තවමත් රහසක්ව පවතී.
