අරමුදල් සම්මත නොකිරීම හේතුවෙන් වසා දමා ඇති අමෙරිකානු රජයේ කටයුතු යළි ආරම්භ කිරීම සදහා එක්සත් ජනපද මන්ත්‍රී මණ්ඩලයේ ඡන්ද විමසීම අද දිනයේ සිදු කිරීමට නියමිතව තිබෙනවා.
රජයේ කටයුතු අවහිර කිරීම අවසන් කර රජයට අරමුදල් සැපයීමට අදාළ පනතක් එක්සත් ජනපද සෙනට් සභාව විසින් සම්මත කර ඇති අතර එම පනත් කෙටුම්පත අනුමැතිය සදහා නියෝජිත මන්ත්‍රී මණ්ඩලය ඡන්දය ප්‍රකාශ කිරිමට නියමිත බවයි විදෙස් මාධ්‍ය වාර්තාවල දැක්වෙන්නේ.
එය සම්මත වුවහොත් එම පනත් කෙටුම්පත අනුමැතිය සදහා අද පස්වරුවේම ජනාධිපති ඩොනල්ඩ් ට්‍රම්ප් අත්සන් තැබීමට නියමිත බවයි විදෙස් වාර්තා අනාවරණ කර ඇත්තේ.
රජයේ කටයුතු පවත්වාගෙන යාමට අදාළ අරමුදල් අත්හිටුවීම හේතුවෙන් අමෙරිකානු රජයේ කටයුතු අක්‍රීය වී මේ වනවිට දින 43 ක් ගත වි තිබෙනවා.
එය අමෙරිකානු ඉතිහාසයේ රජයේ කටයුතු වසා දැමුණු දීර්ඝතම කාලසීමාව ලෙසයි විදෙස් මාධ්‍ය වාර්තාවල දැක්වෙන්නේ.
පාලක රිපබ්ලිකන් පක්ෂය ඉදිරිපත් කළ අරමුදල් පැකේජයක් සෙනට් මන්ත්‍රී මණ්ඩලයේදී සම්මත කිරීම, ඩිමොක්‍රටික් පක්ෂය විසින් අවහිර කිරීම හේතුවෙන් අමෙරිකා එක්සත් ජනපද රජය නිල වශයෙන් වසා දැමීමට සිදුවුණේ ඉකුත් ඔක්තෝම්බර් මාසයේදීයි.
අදාල අරමුදල් පැකේජයෙන් සෞඛ්‍ය සඳහා වෙන්කර ඇති මුදල් වැඩිකරන ලෙස ඩිමොක්‍රටික් පක්ෂය විසින් ඉල්ලා තිබූ අතර පාලක රිපබ්ලිකන් පක්ෂය එකඟ නොවීම හේතුවෙන් එම අරමුදල් පැකේජය සම්මත කිරීම ඩිමොක්‍රටික් පක්ෂය විසින් අවහිර කර තිබුණා.
අමෙරිකාවේ කොන්ග්‍රස් මණ්ඩලයේ බහුතර බලය පාලක රිපබ්ලිකන් පක්ෂය සතු වුවද සෙනෙට් මන්ත්‍රී මණ්ඩලයේ බහුතරය ඩිමොක්‍රටික් පක්ෂයට හිමිව ඇති බැවින් එලෙස අදාල අරමුදල අවහිර කිරීමට හැකි වුණා.
ඒ හේතුවෙන් ෆෙඩරල් සේවකයින් දහස් ගණනක වැටුප් අහිමිවීම හෝ සේවයෙන් ඉවත් කිරීම වැනි ගැටළුවලට මුහුණපෑමට සිදුවූ බවයි විදෙස් මාධ්‍ය වාර්තා කළේ.
