සෞඛ්‍ය අමාත්‍යංශය යටතේ ඇති නියෝජ්‍ය වෛද්‍ය පරිපාලන ශ්‍රේණියේ තනතුරු සඳහා 2016දී අයදුම්පත් කැඳවූවද පැවති අඩුපාඩු හේතුවෙන් සම්මුඛ පරීක්ෂණ පැවැත්වීමට නොහැකි වූ බව එම අමාත්‍යංශය පවසනවා.
ඒ, අධ්‍යක්ෂ තනතුරු මගින් පාලනය වන රෝහල් 110ක නියෝජ්‍ය අධ්‍යක්ෂ තනතුරු පුරප්පාඩු වී ඇති බවට රජයේ වෛද්‍ය නිලධාරීන්ගේ සංගමය ඉකුත් දා කළ ප‍්‍රකාශයට පිළිතුරු වශයෙන්.
එමෙන්ම මෙම පුරප්පාඩු සම්බන්ධයෙන් වෛද්‍ය පරිපාලන ක්ෂේත‍්‍රයේ නිලධාරීන් පිරිසක් නඩුවක් ද ගොනු කර තිබෙනවා. මෙම කරුණු සළකා බලා නිලධාරීන් පත් කිරීම සඳහා අමාත්‍ය මණ්ඩල පත‍්‍රිකාවක් ඉදිරිපත් කිරීමට සෞඛ්‍ය අමාත්‍ය රාජිත සේනාරත්න පියවර ගෙන තිබූ බවයි සෞඛ්‍ය අමාත්‍යංශය පැවසුවේ.
ඒ සඳහා එල්ල වූ ප‍්‍රතිවිරෝධතා හමුවේ කැබිනට් අනු කමිටු 2ක් සහ විද්වත් කමිටු 2ක් මගින් නිර්දේශ ලබා ගැනීමෙන් අනතුරුව 2018 ජනවාරි 30 වනදා නිර්දේශ ලබාදී ඇති බව සඳහන්.
එම නිර්දේශ අනුව රාජය සේවා කොමිසම සමග සාකච්ඡා කර සම්මුඛ පරීක්ෂණ කඩිනම් කිරීමට කටයුතු කරන බවයි සෞඛ්‍ය අමාත්‍යංශය පවසන්නේ. ඒ අනුව, ඉදිරි දෙසතිය තුළ මේ සඳහා විසඳුම් ලබා දීමට හැකි බව ද අමාත්‍යංශය වැඩිදුරටත් සඳහන් කළා.
