ඉන්දියාව සහ යුරෝපා සංගමය අතර ඇති කර ගැනීමට නියමිත ද්විපාර්ශ්වික නිදහස් වෙළඳ ගිවිසුමට (FTA) අනුමැතිය ලබා ගැනීමේ ක්‍රියාවලිය කඩිනම් කිරීමට දෙපාර්ශ්වයම පියවර ගනිමින් සිටියි. ඉන්දීය අග්‍රාමාත්‍ය නරේන්ද්‍ර මෝදිගේ බෙල්ජියම් සංචාරයට සමගාමීව එළඹෙන දෙසැම්බර් මැද භාගය වන විට මෙම ගිවිසුම අවසන් කිරීම දෙපාර්ශ්වයේම ඉලක්කය වී ඇත.
ඇමෙරිකා එක්සත් ජනපදයේ මියාමි නුවර පැවැත්වෙන G20 රාජ්‍ය නායක සමුළුවට සහභාගී වී ආපසු පැමිණෙන අතරතුර අග්‍රාමාත්‍ය මෝදි බෙල්ජියමේ බ්‍රසල්ස් නුවර සංචාරය කිරීමට නියමිතය. එම සංචාරය අතරතුර දෙසැම්බර් 17 හෝ 18 යන දිනවල මෙම ඓතිහාසික ගිවිසුමට අත්සන් තැබීමට නියමිත කාලසීමාවන් වෙන්කර ගෙන තිබේ.
වර්තමානයේ පවතින අස්ථාවර ගෝලීය භූ-දේශපාලනික තත්ත්වයන්ට සාර්ථකව මුහුණ දීම සඳහා ඉන්දියාව සමඟ නිදහස් වෙළඳ ගිවිසුම අනුමත කිරීමේ ක්‍රියාවලිය වේගවත් කරන ලෙස යුරෝපීය කොමිසම (EC) යුරෝපීය කවුන්සිලයෙන් ඉල්ලා සිටීමත් සමඟ මෙම තොරතුරු අනාවරණය වී ඇත.
මෙම අනුමැතිය ලබා ගැනීමේ ක්‍රියාවලිය තවත් ඉක්මන් කිරීම සඳහා, යුරෝපා සංගමයේ භාවිත වන නිල භාෂා 24 ටම ගිවිසුම පරිවර්තනය වන තෙක් නොසිට, එහි මුල් ඉංග්‍රීසි පිටපත පදනම් කරගනිමින් නීතිමය කටයුතු සම්පූර්ණ කිරීමට යුරෝපීය කොමිසම යෝජනා කර තිබේ.
ගිවිසුමට අදාළ ඉදිරි ක්‍රියාපටිපාටික ගැටලු නිරාකරණය කරගැනීම සඳහා ඉන්දීය නියෝජ්‍ය වාණිජ අමාත්‍ය රාජේෂ් අග්‍රවාල් මෙම සතියේ බ්‍රසල්ස් නුවර බලා පිටත්ව යාමට නියමිතය.
මේ අතර, ඉන්දීය වාණිජ අමාත්‍ය පියුෂ් ගෝයල් ද යුරෝපා සංගමයේ ප්‍රධාන පෙළේ රටවල් දෙකක් වන ජර්මනිය සහ නෙදර්ලන්තය යන රටවල නිල සංචාරයක නිරත වෙමින් සිටියි.
