ඉන්දියාව සහ ඕමානය අතර ඇති කරගත් ඓතිහාසික ‘සමස්ත ආර්ථික හවුල්කාරිත්ව ගිවිසුම’ (CEPA) ඉන්දීය වේලාවෙන් ඊයේ පස්වරු 2:00 ට නිල වශයෙන් බලාත්මක වී තිබේ.
ඉන්දීය අග්රාමාත්ය නරේන්ද්ර මෝදි සහ ඕමානයේ සුල්තාන් හයිතම් බින් තාරික් ඉදිරියේ, පසුගිය දෙසැම්බර් 18 වැනිදා මෙම ගිවිසුමට අත්සන් තබන ලදී.
ඒ සඳහා ඉන්දීය වාණිජ හා කර්මාන්ත අමාත්ය පියුෂ් ගෝයල් සහ ඕමානයේ වාණිජ, කර්මාන්ත හා ආයෝජන ප්රවර්ධන අමාත්ය කයිස් බින් මොහොමඩ් අල් යූසෙෆ් එක් විය.
ඉන්දීය වාණිජ අමාත්යාංශය පෙන්වා දෙන්නේ, මෙම ගිවිසුම හරහා ඉන්දියාවේ ශ්රම-දැඩි ක්ෂේත්රයන් රැසකට දැවැන්ත අපනයන අවස්ථා උදාවන බවයි. ඒ අනුව:
රෙදිපිළි, සම්භාණ්ඩ සහ පාවහන්මැණික් හා ස්වර්ණාභරණ, ඉංජිනේරු නිෂ්පාදන, ප්ලාස්ටික් සහ ගෘහ භාණ්ඩ, කෘෂිකාර්මික නිෂ්පාදන, ඖෂධ, වෛද්ය උපකරණ සහ මෝටර් රථ ක්ෂේත්රය ඇතුළු නිෂ්පාදන රැසකට ඕමාන් වෙළඳපොළ තුළ විශාල ඉල්ලුමක් නිර්මාණය වනු ඇතැයි අපේක්ෂා කෙරේ.
දෙරට අතර පවතින ද්විපාර්ශ්වික වෙළඳාම දැනට ඇමරිකානු ඩොලර් බිලියන 10 ඉක්මවන අතර, මෙම නව ගිවිසුම් රාමුව යටතේ එය තවදුරටත් පුළුල් කිරීමට ශක්තිමත් විභවයක් පවතී.
වසර 200–300 කට වඩා පැරණි ඉතිහාසයක් ඇති ඉන්දීය වෙළඳ පවුල් ඇතුළු ලක්ෂ 7 කට ආසන්න ඉන්දීය ජාතිකයින් පිරිසක් මේ වන විට ඕමානයේ පදිංචිව සිටිති.
ඔවුන්ගෙන් ඉන්දියාවට ලැබෙන වාර්ෂික ප්රේෂණ ප්රමාණය ඇමරිකානු ඩොලර් බිලියන 2 ක් පමණ වේ. එසේම, මෙම බටහිර ආසියානු රටෙහි විවිධ ක්ෂේත්ර පුරා ඉන්දීය ව්යාපාරික ආයතන 6,000 කට වඩා ක්රියාත්මක වේ.
ඉන්දියාවේ දේශීය ශ්රම-දැඩි අවශ්යතාවලට බාධාවක් නොවන, එහෙත් ඉන්දීය ව්යාපාරවලට නව අවස්ථා සලසා දෙන සංවර්ධිත ආර්ථිකයන් සහිත රටවල් සමඟ වෙළඳ ගිවිසුම්වලට එළඹීමේ ඉන්දීය උපායමාර්ගික වැඩපිළිවෙළෙහි තවත් එක් සාර්ථක පියවරක් ලෙස මෙම ඕමාන් වෙළඳ ගිවිසුම හැඳින්විය හැකිය.
