තායිවාන ජනාධිපති විලියම් ලායිගේ එස්වාටිනි සංචාරය සඳහා ලබා දී තිබූ ගුවන් සීමා අවසරය අප්රිකානු රටවල් තුනක් හදිසියේ ඉල්ලා අස්කර ගැනීම සම්බන්ධයෙන් ඇමරිකා එක්සත් ජනපදය සහ ජපානය දැඩි විරෝධය පළ කර ඇති බව The Taipei Times පුවත් සේවය වාර්තා කරයි.
තායිවානයේ එකම අප්රිකානු මිත්ර රාජ්යය වන එස්වාටිනි හි ම්ස්වාටි රජුගේ පාලනයට වසර 40ක් පිරීම සහ ඔහුගේ 58 වැනි උපන්දිනය වෙනුවෙන් පැවැත්වෙන සැමරුම් උත්සවවලට සහභාගී වීම සඳහා ජනාධිපති ලායි බදාදා සිට ඉරිදා දක්වා සංචාරය කිරීමට නියමිතව තිබිණි.
කෙසේ වෙතත්, සීෂෙල්ස් (Seychelles), මොරිෂස් (Mauritius) සහ මැඩගස්කරය (Madagascar) හදිසියේම සිය ගුවන් සීමා හරහා පියාසර කිරීමට ලබා දී තිබූ අවසරය අවලංගු කළ අතර, එය චීනයේ බලපෑම මත සිදු වූවක් බවට විවේචන එල්ල වී තිබේ.
මේ පිළිබඳව ප්රතිචාර දක්වමින් එක්සත් ජනපද රාජ්ය දෙපාර්තමේන්තුව ප්රකාශ කළේ මෙය ජාත්යන්තර ගුවන් සේවා ප්රොටෝකෝල අවභාවිත කිරීමක් බවයි.
ගෝලීය ගුවන් සීමා කළමනාකරණ පද්ධතිවල මධ්යස්ථභාවයට මෙවැනි ක්රියාවන්ගෙන් හානි සිදුවන බවත්, චීනයේ පීඩනය මත මෙම රටවල් කටයුතු කර ඇති බවටත් ඔවුන් චෝදනා කළහ.
ගුවන් ගමන් තොරතුරු කලාප පවතින්නේ ගුවන් ගමන් ආරක්ෂාව සහතික කිරීමට මිස දේශපාලන අරමුණු සඳහා ආයුධයක් ලෙස භාවිත කිරීමට නොවන බව නිලධාරීහු අවධාරණය කළහ.
තායිවානය රාජ්ය තාන්ත්රිකව හුදකලා කිරීම සඳහා බීජිං පාලනය දියත් කරන මර්දනකාරී උපාය මාර්ගයක කොටසක් ලෙස වොෂින්ටනය මෙය හඳුන්වා දුන් අතර, මෙවැනි ක්රියා කලාපීය ස්ථාවරත්වයට සහ ගෝලීය සමෘද්ධියට තර්ජනයක් වන බවද වැඩිදුරටත් සඳහන් කළේය
