තියුණු තරඟයකින් පසුව සිම්බාබ්වේ කණ්ඩායම සමග පැවති පළමු එක්දින ක්‍රිකට් තරඟය ලකුණු 07කින් විශිෂ්ට ජයක් හිමි කර ගැනීමට ශ්‍රී ලංකා කණ්ඩායම සමත් වුණා. ඒ, අවසන් පන්දු වාරයේදී ඩිල්ෂාන් මදුශංක ලබාගත් කඩුලු ත්‍රිවයත් සමගින්. තරඟයේ පළමුව පන්දුවට පහරදුන් ශ්‍රී ලංකා කණ්ඩායම නියමිත පන්දු වාර 50 අවසානයේදී කඩුලු 06ක් දැවී රැස්කරගත් ලකුණු සංඛ්‍යාව 298ක්. එහි ශ්‍රී ලංකා කණ්ඩායම වෙනුවෙන් ආරම්භක පිතිකරු පැතුම් නිස්සංක පන්දු 92ක් තුළදි හතරේ පහර 12ක් සමගින් ලකුණු 76ක් රැස් කළා. කෙසේවෙතත් නිශාන් මධුෂ්ක කිසිදු ලකුණක් නොලබා දැවී ගියා. කුසල් මෙන්ඩිස්ට රැස් කිරීමට හැකි වූයේ ලකුණු 38ක් පමණයි. කුසල් මෙන්ඩිස් සහ පැතුම් නිශ්ශංක දෙවැනි කඩුල්ල වෙනුවෙන් ලකුණු සියයක සබඳතාවයක් ගොඩනැඟුවා. විශිෂ්ට පිති හරඹයක නිරත වූ ජනිත් ලියනගේ පන්දු 47ක් තුළදී හතරේ පහර 06ක් සහ හයේ පහර 03ක් සමගින් නොදැවී වේගවත් ලකුණු 70ක් රැස් කළා. කමිදු මෙන්ඩිස් පන්දු 36 තුළදි ලකුණු 57යි. කමිදු මෙන්ඩිස් සහ ජනිත් ලියනගේ හයවන කඩුල්ල වෙනුවෙන් පන්දු 83ක් තුළදි රැස් කළ ලකුණු සංඛ්‍යාව 137ක්. ජයග්‍රාහී ලකුණු 299ක ඉලක්කයක් හඹා යාමට පිටියට පිවිසි සිම්බාබ්වේ කණ්ඩායමට නියමිත පන්දුවාර 50 අවසානයේ කඩුලු 8ක් දැවී රැස් කරගත හැකි වූයේ ලකුණු 291 ක් පමණයි. සිම්බාබ්වේ කණ්ඩයමේ පළමු කඩුලු දෙකම ලකුණු පුවරුව ලකුණු බිංදුවක්ව පවතිද්දී දවාගැනීමට ශ්‍රී ලංකා කණ්ඩයමේ පළමු පන්දු වාරය ක්‍රියාත්මක කළ අසිත ප්‍රනාන්දු සමත් වුණා. පළමු පන්දුවෙන්ම බ්‍රයන් බෙනට් ලකුණු නොලබා දැවී ගිය අතර, එම පන්දුවාරයේ සිව්වැනි පන්දුවේදී බ්‍රෙන්ඩන් ටේලර් ද ලකුණු නොලබා නැවත ක්‍රීඩාගාරයට හරවා යැවීමට අසිත ප්‍රනාන්දු සමත් වුණා. කෙසේවෙතත් සිම්බාබ්වේ කණ්ඩායමේ කඩා වැටුණු ඉණිම නැවත ශක්තිමත් කරමින් බෙන් කරන් ලකුණු 70 ක් ලබාගත් අතර ශොන් විලියම්ස් ලකුණු 57ක් රැස් කරමින් සිම්බාබ්වේ කණ්ඩායම නැවත තරඟයට අවතීර්ණ වුණා. ඔවුන් දෙදෙනා තෙවැනි කඩුල්ලට සදහා පන්දු 130ක් තුළදී ගොඩ නැගූ සම්බන්ධතාවය ලකුණු 118ක්. සිකන්ඩ රාසා හා ටෝනි මුන්යොන්ගා 6 වැනි කඩුල්ලට ලකුණු 128 අනගි සබඳතාවයක් පවත්වමින් ශ්‍රී ලංකා කණ්ඩායමේ ජයග්‍රාහි බලාපොරොත්තුව තවදුරටත් ප්‍රමාද කළා. අවසන් පන්දුවාරයේදී සිමබ්ාබ්වේ කණ්ඩායමට කඩුලු පහක් අතැතිව තරගයේ ජයග්‍රහණය කිරීම සඳහා අවශ්‍ය වූයේ ලකුණු 10ක් පමණයි. පීඩනය මැද ශ්‍රී ලංකා කණ්ඩායමේ නායක චරිත් අසලංක අවසන් පන්දුවාරය ක්‍රියාත්මක කිරීම සඳහා එහි වගකීම ශ්‍රී ලංකා වේගපන්දු යවන ඩිල්ෂාන් මදුසංක වෙත ලබා දුන්නා. ඩිල්ෂාන් මදුසංක ඒ වන විටත් පන්දු වාර නවයක් ක්‍රියාත්මක කරමින් ප්‍රතිවාදී සිම්බාබ්වේ කණ්ඩායමට ලකුණු 60 ක් ලබා දී තිබුණා. කෙසේවෙතත් 49 වන පන්දුවාරයේ පළමු පන්දුවේදීම ලකුණු 92 ලබා ගෙන සිටි සිකන්ඩ රාසා දවා ගනිමින් තරගයේ ජයග්‍රහණය පිළිබඳ වැඩි බලාපොරොත්තු යළි ශ්‍රී ලංකාවට ගෙන ඒමට ඩිල්ෂාන් මදුසංක සමත් වුණා. එම පන්දුවාරයේ දෙවැනි පන්දුවට බ්‍රැඩ් එවන්ස් ලකුණු බින්දුවකටත්, රිචර්ඩ් එන්ගරාවා ලකුණු බින්දුවකටත් දවා ගනිමින් මදුෂංක කඩුලු ත්‍රිත්වයක් ලබා ගනිමින් සිය එක්දින මංගල කඩුලු තිත්වයද තමන් සතු කර ගැනීමට ඩිල්ෂාන් මදුෂංක සමත් වුණා. ඒ අනුව ඔහු ඉතිහාසගත වුණේ ශ්‍රී ලංකාව වෙනුවෙන් එක්දින පිටියේදී කඩුලු ත්‍රිත්වයක් බිද හෙලූ 08 වැනි පන්දු යවන්නා ලෙසයි. ඩිල්ශාන් මදුෂංක ලකුණු 62කට කඩුලු 04ක් දවා ගනිමින් තරඟයේ වීරයා සම්මානයෙන් දිනා ගත්තා. අසිත ප්‍රනාන්දු කඩුලු 03ක් දවා ගත්තා. දෙරට අතර දෙවන එක්දින තරඟය හෙට පැවැත්වීමට නියමිතයි.