ස්පාඤ්ඤයේ ප්රධාන වරායන් ආශ්රිතව චීනය සිය බලපෑම සහ ව්යාපාරික කටයුතු ශීඝ්රයෙන් ව්යාප්ත කිරීම, යුරෝපා සංගමයේ මෙන්ම ගෝලීය ආරක්ෂක විශේෂඥයන්ගේ ද දැඩි කනස්සල්ලට හේතු වී තිබේ.
ඔවුන් අනතුරු අඟවන්නේ, උපායමාර්ගිකව වැදගත් නාවික කඳවුරු අසල පිහිටි මෙවැනි වාණිජ යටිතල පහසුකම්, අනාගතයේදී චීනය විසින් සිය මිලිටරි හෝ ඔත්තු බැලීමේ කටයුතු සඳහා භාවිත කිරීමට ඇති ඉඩකඩ වැඩි බවයි.
බීජිං පාලනය ස්පාඤ්ඤයේ ප්රධාන සැපයුම් මධ්යස්ථාන තුළ සිය පැවැත්ම ශක්තිමත් කරමින්, දැවැන්ත ආයෝජන රැසකට සූදානම් වන පසුබිමක මෙම අනතුරු ඇඟවීම් නිකුත් වී ඇත.
මේ යටතේ ක්රියාත්මක වන ප්රධානතම ව්යාපෘතියක් වන්නේ, ස්පාඤ්ඤයේ වයඹදිග ගලීසියා කලාපයේ පිහිටි 'ෆෙරෝල්' නාවික කඳවුරට නුදුරින් චීන රජයට අයත් 'SAIC' මෝටර් රථ නිෂ්පාදන සමාගමේ නව කර්මාන්ත ශාලාවක් ඉදිකිරීමට සැලසුම් කිරීමයි.
චීන රාජ්ය සතු මෙම දැවැන්ත මෝටර් රථ නිෂ්පාදන සමාගම, සිය ප්රධාන පහසුකම් සංකීර්ණ ඉදිකිරීමට බලාපොරොත්තු වන්නේ ෆෙරෝල් වරායේ පිටත භූමියට සෘජුවම මායිම් වන පරිදිය.
මෙම ෆෙරෝල් කලාපය, ස්පාඤ්ඤ නාවික හමුදාවේ ප්රධාන මූලස්ථානයක් සහ එරට ජාතික නැව් නිෂ්පාදන සමාගම වන නැවන්ටියා පිහිටි ස්ථානය ද වෙයි.
එමෙන්ම, මෙම කලාපය උතුරු අත්ලාන්තික් ගිවිසුම් සංවිධානයේ (NATO) ආරක්ෂක මෙහෙයුම් සඳහා ද අතිශය වැදගත් උපායමාර්ගික කේන්ද්රස්ථානයකි.
