මෙවර නුවරඑළියේ පැවැත්වෙන රාජ්‍ය වෙසක් උත්සවය නැරඹීම සඳහා ඊයේ දිනය පුරා අති විශාල සැදැහැවතුන් පිරිසක් නුවරඑළිය නගරයට පැමිණ තිබෙනවා.
නෙත් නිවුස් වාර්තාකරු පැවසුවේ අද උදෑසන සිට ද සැදැහැවතුන් විශාල ලෙස නුවරඑළිය නගරය කරා පැමිණෙමින් ඇති බවයි.
තොරණ, දර්ශනීය පහන් කූඩු ඇතුළු නේකවිධ විචිත්‍රත්වයෙන් මෙවර රාජ්‍ය වෙසක් කලාපය සමන්විතයි.
වෙසක් කලාපය නැරඹීමට පැමිණෙන පිරිස වෙනුවෙන් දන්සැල් රැසක් ද සංවිධානය කර ඇති බවයි නෙත් නිවුස් වාර්තාකරු පැවසුවේ.
වෙසක් කලාපයට පැමිණෙන සැදැහැවතුන් වෙනුවෙන් ලංකා ගමනාගමන මණ්ඩලය සහ පෞද්ගලික බස් රථ එක්ව විශේෂ ප්‍රවාහන පහසුකම් ද සලසා දී තිබෙනවා.
නුවරඑළිය කොට්ඨාස භාර ජ්‍යෙෂ්ඨ පොලිස් අධිකාරි අනුරුද්ධ හක්මණ මහතා පැවසුවේ සැදැහැවතුන් වෙනුවෙන් විශේෂ ආරක්ෂිත වැඩපිළිවෙළක් ද පොලිසිය විසින් දියත් කර ඇති බවයි.
